Qazaqstanda alǵash ret premıým sanattaǵy bolat óndirisi jolǵa qoıylady
QARAǴANDY. KAZINFORM — Qazaqstan metallýrgııasy jańa damý kezeńine qadam basty — Qarmet metallýrgııalyq kombınatynda premıým sanattaǵy joǵary sapaly bolat óndirý josparlanǵan. Bul joba Qytaıdyń jetekshi ınjınırıngtik kompanııalarynyń biri — WISDRI Engineering & Research Incorporation Limited uıymymen áriptestik aıasynda júzege aspaq.
Kompanııa ókilderiniń Temirtaýǵa sapary kásiporyndy jańǵyrtýdyń aýqymdy josparyn iske asyrýdaǵy mańyzdy kezeń boldy.
Qarmet metallýrgııalyq kombınatynda WISDRI kompanııasynyń delegatsııasymen kezdesý ótti. Metallurgical Corporation of China (MCC) quramyna kiretin bul uıym álemdik metallýrgııa salasynda ınjenerlik jáne ǵylymı sheshimderdi ázirleý boıynsha kóshbasshylardyń biri sanalady. 1955 jyly qurylǵan WISDRI kompanııasynyń tájirıbesinde ondaǵan halyqaralyq joba bar — olardyń qatarynda sýyq jáne ystyq prokat jelileri, myryshtaý tehnologııalary jáne tolyq ekologııalyq tsıkldi óndiristik keshender bar.
Sapar barysynda taraptar seriktestiktiń strategııalyq baǵyttaryn jáne Qarmet óndirisin jańǵyrtýǵa múmkindik beretin tehnıkalyq sheshimderdi talqylady. Negizgi bastamalar qatarynda quıý-ılek keshenin salý, sondaı-aq shoıyndy desýlfýratsııalaý, RH, qyshqyldy regeneratsııalaý qondyrǵylaryn jáne úzdiksiz quıý mashınalaryn jańartý jobalary bar. Bul jobalardy júzege asyrý 2026–2027 jyldarǵa josparlanyp otyr.
Qarmet ókilderiniń aıtýynsha, WISDRI ınjenerleri óndiristiń tıimdiligin jáne ekologııalyq turaqtylyǵyn arttyratyn birqatar ınnovatsııalyq sheshimder usynǵan. Ásirese, qorshaǵan ortaǵa shyǵaryndylardy azaıtý, resýrstardy únemdeý jáne energııa tutynýdy ońtaılandyrýǵa baǵyttalǵan zamanaýı tehnologııalar erekshe qyzyǵýshylyq týdyrdy.
Quıý-ılek kesheniniń qurylysy Qarmet kásipornyn jańǵyrtýdyń aýqymdy baǵdarlamasyndaǵy negizgi kezeńderdiń biri bolmaq. Bul joba Qazaqstannyń tehnologııalyq táýelsizdigin nyǵaıtyp qana qoımaı, mashına jasaý, qurylys, energetıka jáne qorǵanys ónerkásibi salalarynda joǵary suranysqa ıe premıým sapaly bolatty óndirýge múmkindik beredi.
Jańa óndiristik nysandardyń iske qosylýy otandyq metallýrgııanyń básekege qabilettiligin arttyryp, jańa jumys oryndaryn ashýǵa, salyq túsimderiniń ósýine jáne óńirdiń ónerkásiptik damýyna serpin bermek.
– WISDRI sekildi seriktestermen yntymaqtastyq Qarmet kásipornynyń tehnologııalyq deńgeıin jańa beleske kóterip, ulttyq ekonomıkanyń damýyna eleýli úles qosady dep senemiz, – dep atap ótti kompanııa ókilderi.
Osylaısha, aldaǵy jyldary Temirtaýda júzege asyrylatyn jobalar tek óndiristik ınfraqurylymdy jańǵyrtý ǵana emes, sonymen qatar Qazaqstan metallýrgııasynyń jańa býynyn — ekologııalyq taza, ınnovatsııalyq jáne álemdik naryqqa baǵyttalǵan óndiris modelin qalyptastyrý jolyndaǵy mańyzdy qadam bolmaq.
Aıta keteıik, buǵan deıin Qarmet kompanııasynyń «Shahtınskaıa» shahtasynda jańa eńbek jetistigi tirkelgen bolatyn — ýchaskelik brıgada bir aıda júzdegen metr kómir qazyp, óz rekordyn jańartty.