Alǵash ret mektepte «pedagog-proforıentator» laýazymy resmı túrde engizildi

ASTANA. KAZINFORM — Prezıdent tapsyrmasyna sáıkes jáne Jumysshy mamandyqtary jyly aıasynda elimizdiń orta bilim berý uıymdarynda pedagog-kásiptik baǵdar berýshi laýazymy resmı túrde bekitildi.

Oqý-aǵartý mınıstrliginiń baspasóz qyzmeti málim etkendeı, bul bastama oqýshylarǵa mamandyq tańdaýda erte baǵyt-baǵdar berýge, sondaı-aq oqýshylar, ata-analar, pedagogter, kolledjder men jumys berýshiler arasyndaǵy ózara baılanys pen yntymaqtastyqtyń tıimdiligin arttyrýǵa baǵyttalǵan.

Pedagog-kásiptik baǵdar berýshiniń negizgi mindetteri:

Oqýshylarǵa mamandyq pen bilim baǵytyn tańdaýda qoldaý kórsetý;

Jeke jáne toptyq kásibı keńes berý jumystaryn júrgizý;

Kásiptik baǵdar berýge arnalǵan is-sharalardy uıymdastyrý; 

Jumyspen qamtý ortalyqtarymen, kolledjdermen jáne kásiporyndarmen baılanys ornatý;

Oqýshylarǵa eńbek naryǵyndaǵy suranysqa ıe mamandyqtar men zamanaýı úrdister týraly aqparat berý.

— Jańa laýazymnyń engizilýi oqýshylardyń sana­ly ári durys kásiptik tańdaý jasaýyna kómektesedi, jumysshy mamandyqtarynyń bedelin arttyryp, eńbekke beıim, bilikti jáne básekege qabiletti urpaq tárbıeleýge yqpal etedi, — delingen habarlamada.

Buǵan deıin qoldanysqa berilgen 217 «jaıly mektepti» kútip ustaýǵa jyl saıyn 7 mlrd teńge kerek ekeni aıtyldy.