Qazaqstanda alǵash ret óńirlik travmatologııalyq ortalyqtardyń biryńǵaı jelisi qurylyp jatyr
ASTANA.KAZINFORM - Qazaqstanda jaraqat kezinde medıtsınalyq kómek kórsetýdiń jańa modeline negizdelgen óńirlik travmatologııalyq ortalyqtardyń (ÓTO) biryńǵaı jelisin qurý jobasy iske qosylyp jatyr. Joba akademık Batpenov atyndaǵy Ulttyq ǵylymı travmatologııa jáne ortopedııa ortalyǵy (UǴTOO) tarapynan ázirlenip, Densaýlyq saqtaý mınıstrliginiń qoldaýymen júzege asyrylyp jatyr.
Elimizde jyl saıyn júzdegen myń jaraqat tirkeledi, al jol-kólik oqıǵalary ólimniń negizgi sebepteriniń biri bolyp otyr. Bul rette ólim jaǵdaılarynyń 40%-ǵa jýyǵy jaraqat alǵannan keıingi alǵashqy saǵattarda, mamandandyrylǵan medıtsınalyq kómekke der kezinde qoljetimdiliktiń bolmaýynan bolady.
ÓTO qurý osy máseleni sheshýge baǵyttalǵan. Ortalyqtar táýlik boıy jumys istep, shuǵyl kómek pen reanımatsııadan bastap joǵary tehnologııalyq operatsııalar men ońaltýǵa deıingi tolyq medıtsınalyq qyzmetter keshenin qamtamasyz etedi. Bul naýqastardy iri qalalarǵa tasymaldaýǵa ýaqyt joǵaltpaı, qajetti kómekti sol jerde kórsetýge múmkindik beredi.
ÓTO óńirlerdegi travmatologııalyq qyzmettiń úılestirýshi ortalyqtaryna aınalady: dárigerler UǴTOO jetekshi mamandarynan naqty ýaqyt rejıminde konsýltatsııa ala alady, telemedıtsına tehnologııalary engiziledi, kadrlardy daıarlaý kúsheıtiledi.
Pılottyq joba Astana qalasynda, Almatydaǵy №4 qalalyq klınıkalyq aýrýhanasynyń bazasynda jáne Balqash qalasynda iske asyrylý satysynda. Aldaǵy ýaqytta jaraqattaný deńgeıi joǵary óńirlerde jelini keńeıtý josparlanyp otyr.
Jobany engizý jaraqattardan bolatyn ólim men múgedektikti azaıtýǵa, medıtsınalyq kómekti kórsetý ýaqytyn qysqartýǵa jáne óńir turǵyndary úshin joǵary tehnologııalyq medıtsınanyń qoljetimdiligin arttyrýǵa múmkindik beredi.
Buǵan deıin habarlanǵandaı, 2025 jyly jol-kólik oqıǵalarynyń saldarynan 51 myńnan astam qazaqstandyq zardap shegip, onyń ishinde 2,3 myń adam qaza tapqan. Sonymen qatar, ýaqtyly kórsetilgen bilikti medıtsınalyq kómektiń arqasynda ólim deńgeıi 10%-ǵa tómendegen. Jedel medıtsınalyq járdem qyzmetiniń shamamen 796 myń shaqyrtýynyń 44 myńy (5,6%) jol-kólik oqıǵalaryna qatysty bolǵan.
Aıta keteıik, Almatyda óńirlik Travmatologııa jáne ortopedııa ortalyǵy qurylady.
