Qazaqstanda alǵash ret onkologııany emdeýdiń biregeı ádisi qoldanyldy
Astanada «UMIT» halyqaralyq onkologııalyq tomoterapııa ortalyǵy men Ulttyq ana men bala ortalyǵynyń onkologtary sheteldik mamandarmen birlesip, onkologııalyq aýrýlardy emdeýdegi sońǵy ádistemeni – «Total Body Irradiation»(TBI) qoldaný boıynsha oqytý sheberlik sabaǵyn ótkizgen bolatyn. Súıek kemigin transplantatsııalaýdy qajet etetin naýqas qyzdy mysalǵa ala otyryp, UMIT Halyqaralyq onkologııalyq ortalyq mamandary reseılik onkologtar jáne Ana men bala ulttyq ortalyǵynyń dárigerlerimen birlesip, deneni jalpy sáýlelendirýdiń biregeı ádisin qoldandy.
«12 jastaǵy Káýsarǵa qaterli isik aýrýyn emdeý úshin súıek kemigin aýystyrý kerek. Ol buǵan deıin Túrkııada em qabyldaǵan. Biraq, donnor tabylmaı elge kelgen. Endi Elordadaǵy ortalyqta naýqastyń búkil denesin tolyq sáýlelendirý arqyly emdeý júrgizildi. Bul onkologııalyq naýqasty súıek kemigin transplantatsııalaýǵa daıyndaýdaǵy qajetti qadam. Buryn bul protsedýra Qazaqstanda eshqashan qoldanylmaǵan», - delingen baspasóz baıanynda.
Jalpy TBI tehnologııasy sáýlelendirýdi naqty aımaqtardaǵy isikti joıý úshin qoldanylmaıdy, búkil deneni súıek kemigin transplantatsııaǵa daıyndaýǵa arnalǵan. Transplantatsııalanǵan súıek kemiginiń negizinde adam aǵzasy aýrý-syrqaýsyz óziniń ári qaraı ómir súrýin jáne qalpyna kelýin jalǵastyrady.
«Bul Qazaqstannyń búkil densaýlyq saqtaý salasynyń jetistigi ekeni sózsiz. Óıtkeni, búgingi kúnge deıin birde-bir onkologııalyq dıspanserde leıkozdyń mıeloıdty leıkoz, lımfoblastıkalyq leıkoz sııaqty túrlerimen aýyratyn naýqastarǵa súıek kemigin transplantatsııalaý arqyly emdeý kezinde deneni tolyq sáýlelendirý júrgizilmegen», - deıdi «UMIT» Halyqaralyq onkologııalyq tomoterapııa ortalyǵynyń dırektory Erjan Shaıahmetov.
Jyl saıyn elimizde 36-37 myń qaterli isikke shaldyqqan naýqas anyqtalatynyn eskersek, bolashaqta bul jańa tásildiń Ult saýlyǵyn saqtaýda berer kómegi zor deıdi sala mamandary.
Resmı málimet boıynsha, Qazaqstanda qan túzý jáne lımfa júıesiniń onkologııalyq aýrýlarymen aýyratyn 9 myńnan astam naýqas bar. Ári jyl saıyn 1500-ge deıin jańa naýqastar tirkeledi, onyń ishinde 232 jaǵdaı (2021 jyldyń derekteri boıynsha) jedel leıkozben aýyratyn balalar. Jedel lımfoblastıkalyq leıkozben aýyratyn balalardyń 5 jyldyq jalpy ómir súrý deńgeıi byltyr (2021 jyldyń kórsetkishi) shamamen 72% quraǵan.
