Qazaqstanda alǵash ret oblysty jeke-dara álemge tanystyrý bastamasy qolǵa alyndy

Atalǵan bastama alǵash ret uıymdastyrylyp otyr. Negizgi maqsat - ınvestıtsııalardy kóptep tartý, dep xabarlaıdy QazAqparat tilshisi.

"Oblystyń tusaýkeserine aımaqtyń 37 kásiporny qatysyp otyr. Sonyń 24-si ınvestıtsııalardy tartýdy kózdeıdi. Qarjynyń jalpy kólemi - 1,5 trln. teńge. Negizgi sala, ol - aýyl sharýashylyǵy. Budan bólek, mashına jasaý, taý-ken jáne taǵy basqa salalar bar. Máselen, biz jylyna astyqtyń 2 mln. tonnasyn eksportqa shyǵara alamyz. Sosyn un bar. Byltyr biz 1,1 mln. tonna unnyń 80 paıyzyn syrtqa shyǵardyq. Oblysta un shyǵaratyn 80 dıirmen bar. Sondyqtan ol jaǵynan eksportty arttyratyn múmkindigimiz mol", - dedi oblys ákimi Arxımed Muxambetov jýrnalısterge bergen suxbatynda. Ákimniń sózine qaraǵanda, búginde oblysta shyǵarylatyn taýarlardy Iran, Saýd Arabııasy men Qytaıǵa jetkizý jaǵy qaralyp jatyr. Budan bólek, Qostanaı oblysy Reseımen shekaralas aýdandarmen ózara saýda-sattyqty ulǵaıtýdy kózdeıdi.
 

Búgingi sharany uıymdastyrýshylary - QR Investıtsııalar jáne damý mınıstrligi, sondaı-aq QR Syrtqy ister mınıstrligi. "Biz úshin bul - óte jaýapty mindet. Qostanaı oblysynyń jetistikterin dúnıejúzine kórsetip jatyrmyz. Qazaqstanda óndirilip jatqan taýarlardy shet elderge kóptep shyǵaryp, ınvestıtsııalardy keńinen tartý qajet. Osyǵan baılanysty Memleket basshysy da úlken mindetter qoıyp otyr", - deıdi syrtqy ister mınıstri Qaırat Ábdiraxmanov. Onyń aıtýynsha, Qostanaı oblysynyń tanystyrylymyna elshiler ǵana emes, sheteldiń bıznes ókilderi de qatysty.

Aıta keteıik, búgin  syrty ister mınıstrliginde elshilerge Qazaqstannyń aýyl sharýashylyǵyn damytý baǵdarlamasy tanystyryldy. Atalǵan sharaǵa QR Premer-Mınıstriniń orynbasary - aýyl sharýashylyǵy mınıstri Asqar Myrzaxmetov qatysty.  Al Qostanaı oblysynyń ákimi Arxımed Muxambetov "Kazmedıa" ortalyǵynda brıfıng ótkizip, oblystyń áleýmettik-ekonomıkalyq jaǵdaıy týraly aıtyp berdi. Onyń aıtýynsha, bıyl oblysta jeke turǵyn úı qurylysy boıynsha 300-ge jýyq kottedj salynady . Al EKSPO kórmesine Qostanaı oblysynda qurastyrylǵan 400 avtobýs jetkiziledi.

 Osydan keıin oblys ákimi Muxambetov bastaǵan delegatsııa "Rixos" qonaq úıinde elshilermen kezdesip, aımaqtyń ekonomıkalyq jetistikterin tanystyrdy. Tanystyrylym túski as ústinde ótti. Sharaǵa Investııatsııalar jáne damý mınıstri Jeńis Qasymbek te qatysty.