Qazaqstanda alǵash ret mobıldi kıno festıvali ótip jatyr
ALMATY. QazAqparat –Qazaqstanda «Mobile Blockbuster film festival» (MBff) qysqa metrajdy fılmderdiń alǵashqy festıval bastaldy. Jobanyń ereksheligi – baıqaýǵa qatysatyn barlyq fılmder planshet nemese telefon kamerasyna túsirilýi qajet, dep habarlaıdy QazAqparat tilshisi.
Joba arqyly festıval uıymdastyrýshylary - stsenarıst jáne rejısser Dmıtrıı Baınazarov bastaǵan MBff Production toby karantın kezeńinde shyǵarmashylyq qaıratkerlerge qoldaý kórsetip, olardyń shyǵarmashylyq energııasy men darynyn jańa baǵytqa burýǵa sheshim qabyldady.
«Mobıldi kınonyń kıno ındýstrııaǵa jańa format retinde engenine 10 jyldan astam ýaqyt boldy. Alaıda, bizdiń elde jáne búkil TMD elderinde ónerdiń bul túrine qyzyǵýshylyq endi ǵana artyp kele jatyr. Zamanaýı gadjetterdiń qosymsha jabdyqtarsyz jáne shyǵynsyz joǵary sapaly foto nemese vıdeo jasaıtyn múmkindigi bar. Mundaı tehnologııalar talantty rejısserler men operatorlarǵa óz ıdeıalaryn júzege asyrýǵa, eksperıment júrgizýge, jańa vızýaldy sheshimderdi izdeýge, sol arqyly sandyq tehnologııalarmen bir baǵytta qozǵalýǵa múmkindik beredi. Osy oraıda, Adam potentsııalyn damytýdy maqsat tutatyn Tuńǵysh Prezıdent Qory mobıldi kıno formatyndaǵy otandyq kıno óndirisindegi jańa esimderdi qoldaýǵa daıyn», - deıdi Qordyń Almatydaǵy ókildiginiń dırektory Sergeı Tohtarov.
Mobile Blockbuster film festival baıqaýynyń taqyryby – «maskalar». Maskalar sóziniń maǵynasy keń. Ol medıtsınalyq, teatrlyq, áleýmettik jáne adamnyń kúndelikti ómirde kıetin maskasy bolýy múmkin.
Baıqaýǵa qatysý úshin fılmdi tek smartfonǵa nemese planshetke túsirý kerek. Fılmderdiń jalpy uzaqtyǵynyń 10%-yn dronmen nemese ekshn-kameralarmen túsirýge bolady. Shamdar, krandar, arbalar, «petlıchkalar» jáne t.b. osyndaı kez-kelgen óndiristik jabdyqtarǵa ruqsat etiledi.
Beıne faıldardyń júkteý júıesine júktelgen siltemesin jáne arnaıy formada toltyrylǵan ótinimdi festıvaldiń MBfilmfest.kz@gmail.com elektrondyq poshtasyna jiberý kerek.
Qatysýshylardy tirkeý jáne jumystardy qabyldaý 2020 jyldyń 12 sáýirinen 15 mamyryna deıin júrgiziledi. MBff jeńimpazdary 2020 jyldyń 17 mamyrynda onlaın formatta anyqtalady.
Baıqaýdyń tolyq sharttary fpp.kz saıtynda «Baıqaýlar» bóliminde jáne mbfilmfest.com saıtynda jarııalanǵan.
