Qazaqstanda alǵash ret Leonardo da Vınchıdiń «Ádemi hanshaıym» kartınasy kópshilik nazaryna usynyldy
ASTANA. KAZINFORM – Qazaqstanda alǵash ret Leonardo da Vınchıdiń qupııaǵa toly biregeı jaýharlarynyń biri «Ádemi hanshaıym» (La Bella Principessa) kartınasy kópshilik nazaryna usynyldy. Bul týraly Mádenıet jáne aqparat mınıstrliginiń baspasóz qyzmeti málimdedi.
«La Bella Principessa» – bul XV ǵasyrdyń sońynda Leonardo da Vınchıdiń qolynan shyqqan ıtalıalyq aqsúıekter áýletinen shyqqan jas qyzdyń portreti. Kartına kezinde joǵalyp ketip, qaıtadan tabylǵan. Bul – qupııaǵa toly biregeı týyndylardyń biri.
Kórmege arnalǵan baspasóz máslıhatynda QR Mádenıet jáne aqparat mınıstrligi Mádenıet komıtetiniń tóraǵasy Kúmis Seıitovanyń aıtýynsha, atalǵan is-shara Qazaqstan men Italııanyń mádenıet pen óner salasyndaǵy yntymaqtastyǵyn damytýǵa jańa serpin beredi.
«Leonardo da Vınchı – adamzat tarıhyndaǵy eń uly tulǵalardyń biri. Onyń keskindeme, ǵylym, ınjenerııa jáne anatomııa sııaqty kóptegen saladaǵy jetistikterin atap ótýge bolady. Onyń talanty men álemdi ózgeshe kórý qabileti beıneleý óneriniń birqatar keremet týyndylaryn jasaýǵa, adam tanymynyń ártúrli salalaryna aıtarlyqtaı úles qosqan ǵylymı jańalyqtar jasaýǵa múmkindik berdi. Qazaqstandyqtar úshin aty ańyzǵa aınalǵan sýretshiniń jumysyn óz kózimen kórýge erekshe múmkindik týyp otyr», –dedi Kúmis Seıitova.
Aıta keteıik, buryn atalǵan kartına búkil álem boıynsha nebári bes ret kórsetilgen. Ár kórme saıyn synshylar men kórermenderdiń úlken qyzyǵýshylyǵyn týdyrǵan.
Kórme 7 maýsym men 4 tamyz aralyǵynda QR Ulttyq mýzeıiniń mýltımedııalyq zalynda ótedi.
