Qazaqstanda alǵash ret qýyqaldy bezge biregeı ota jasaldy
ASTANA. QazAqparat - «UMC» korporatıvtik qorynyń Respýblıkalyq dıagnostıkalyq ortalyǵynda Qazaqstanda alǵash ret ambýlatorııalyq jaǵdaıda «Qýyqaldy beziniń qatersiz gıperplazııasy kezinde tamyr ishindegi embolızatsııa» biregeı otasy jasaldy, dep habarlaıdy QazAqparat qordyń baspasóz qyzmetine silteme jasap.
«UMC» korporatıvtik qorynyń Respýblıkalyq dıagnostıkalyq ortalyǵynyń Sáýleli dıagnostıka bóliminde ambýlatorııalyq jaǵdaıda «Qýyqaldy beziniń qatersiz gıperplazııasy kezinde tamyr ishindegi embolızatsııa» biregeı medıtsınalyq tehnologııasy atqaryldy.
Mundaı ota Qazaqstanda alǵash ret jasalyp otyr. Jańa tehnologııany meńgerý úshin ortalyqtyń eki qyzmetkeri - professor B.Ábishev pen dáriger K.Baıjanuly Brazılııanyń San-Paýlo qalasynyń ýnıversıtettik klınıkasyna baryp, atalǵan tásildiń negizin qalaýshy professor Frantsısko Karnevaleden úırenip qaıtty.
Qýyqaldy beziniń qatersiz gıperplazııasy erlerdiń jynystyq júıesinde barynsha jıi kezdesetin, egde tartqan kisilerdiń ómirine qıynshylyq týdyratyn aýrý sanalady. Aýrýdyń qaıtalanýy, naýqastyń jasy, qater júretin ózge de dıagnozdar aýrýdy qıyndata túsedi. Dástúrli hırýrgııalyq ádister boıynsha ony emdeý úshin deneni kesip, narkoz qoldanylady jáne otadan keıin kúrdeli asqyný bolýy yqtımal. Osy sebepti ol sharalar naýqastardyń kópshiligine jasalynbaıdy jáne konservatıvtik terapııa tıimsiz bolady.
Atalǵan tehnologııa az zaqymdy jáne joǵary nátıjeli sanalady jáne ony qoldaný aspektileri jiti zertteýdi qajet etedi. Birinshi kezekte kórsetilimderi men qarsy kórsetilimderi anyqtalady, ony jasaýdyń tehnıkalyq máseleleri qaralady, embolızatsııa jasaý uzaqtyǵy qysqarady, bolýy yqtımal asqynýlardyń aldyn alady jáne t.b.
Qýyqaldy bezine embolızatsııa jasaý úshin arnaıy oqytylǵan, túrli tamyrlarǵa embolızatsııa jasaý tájirıbesi bar medıtsınalyq mamandar kerek. Olar - tamyrlardy súmbileýde tájirıbelik mashyǵy bar, kishi jambas organdary tamyrlarynyń anatomııasyn biletin rentgenhırýrg, tájirıbeli rentgenoperatsııalyq meıirger.
