Qazaqstanda alǵash ret qutqarýshylar týraly telehıkaıa túsirildi

ALMATY. QazAqparat - Almaty qalasynyń tótenshe jaǵdaılar departamenti órt sóndirýshi-qutqarýshy mamandyǵynyń ımıdjin arttyrýǵa baǵyttalǵan «Tótenshe jaǵdaı» telehıkaıasyn jaryqqa shyǵardy. Telehıkaıa shynaıy oqıǵalar negizinde túsirilgen, dep habarlaıdy QazAqparat tilshisi.

Almaty qalalyq TJD-nyń baspasóz qyzmeti habarlaǵandaı, jobanyń túsirilimine otandyq kınomatografııa akterleri, TJD, QR TJM Apattar medıtsınasy ortalyǵy, Respýblıkalyq jedel-qutqarý jasaǵynyń qyzmetkerleri tartyldy.

Sıýjet boıynsha tabysty kásipker inisiniń balasy Aslandy tárbıeleý maqsatynda Almaty qalasynyń TJ departamentine jumysqa ornalastyrady. TJD qyzmetinde Aslan Tótenshe jaǵdaılardy joıý basqarmasy komandasynyń quramyna kiredi. Ol kezekshilikke túsedi, órt sóndiredi, adamdardy qutqarady, sonymen birge, ujymmen dostasýǵa tyrysady. Ýaqyt óte kele Aslan qutqarýshynyń jumysy oılaǵandaı ońaı emes ekenin jáne áriptesteriniń qurmetine ıe bolýǵa tyrysa bastaıdy.

«Almaty qalasy TJD qyzmetiniń basymdylyǵy azamattardyń ómirin, densaýlyǵyn jáne múlkin tótenshe jaǵdaılardan qorǵaý bolyp tabylady. Sonymen qatar, profılaktıkalyq is - sharalardyń sapasy, TJ ýaqtyly joıý, onyń tıimdiligine materıaldyq-tehnıkalyq jáne kadrlyq qamtamasyz etýdiń jıyntyǵymen qol jetkizý mańyzdy ról atqarady»,- dep habarlady qalalyq TJD-nyń baspasóz qyzmeti.

Sondaı-aq qalalyq TJD-da qazirgi tańda órt sóndirýshi-qutqarýshylar men júrgizýshilerdiń 200-den astam bos laýazymy bar ekenin málim etti.

«Osyǵan baılanysty jastardy azamattyq qorǵaý organdary qyzmetkerleriniń qataryna tartý boıynsha is-sharalar ótkizý qajettiligi týyndady» - dep habarlady departamentte.

Eske salsaq, Memleket basshysy Qasym-Jomart Toqaev qutqarýshylardy kásibı merekesimen quttyqtaǵan bolatyn.