Qazaqstanda alǵash ret kolledj bitirýshilerdiń bilimin jumys berýshiler baǵalaıtyn bolady - E.Sádýaqasova
ASTANA. QazAqparat - Aldaǵy ýaqytta kolledj bitirýshilerdiń bilimin jumys berýshiler baǵalaıtyn bolady. Bul Qazaqstannyń bilim júıesinde alǵash ret qoldanylmaq.
Bul týraly QR Prezıdenti janyndaǵy Ortalyq kommýnıkatsııalar qyzmetinde ótken brıfıngte «Kásipqor» holdıngi» UAQ basqarma tóraıymy Eldana Sádýaqasova málim etti. Eske salaıyq, brıfıng barysynda tehnıkalyq jáne kásibı dýaldyq oqytý máseleleri talqylanǵan bolatyn.
«Álemdik deńgeıdegi kolledjderdiń bilim berý júıesine sáıkes, bilim úderisinde jumys berýshiler basym ról atqarady. Máselen, jumys berýshimen stýdentterdiń teorııalyq bilim alǵany, ondaı bilim sheberlik zerthanalarda shyńdalǵany rastalady. Budan keıin, stýdentter sol jumys berýshilerge óndiristik tájirıbeden ótýge joldanady. Sonymen qatar, jumys berýshiler kolledjdiń oqytý baǵdarlamasy ózderiniń suranystaryn tolyq qanaǵattandyratynyn da rastaıdy. Eń aqyry stýdent oqýyn bitiretin kezde, olardyń úlgerimine qatysty qorytyndy baǵany bizdiń kolledjder shyǵarmaıdy, munymen jumys berýshi aınalysady. Bul Qazaqstanda alǵash ret qoldanylatyn tájirıbe», - dedi «Kásipqor» holdıngi» UAQ basqarmasynyń tóraıymy Eldana Sádýaqasova.
Onyń aıtýynsha, kolledjdi bitiretin stýdentterge sertıfıkattar, biliktilik berý máselesiniń bári jumys berýshilerge júkteledi. Bul úshin táýelsiz baǵalaý jáne biliktilik berý ortalyqtary arnaıy qaýymdastyqtardy quryp jatyr.
«Al jumys berýshiler biliktilik pen sertıfıkattar bergennen keıin ǵana, bizdiń kolledjder túlekterge dıplomdy tabys etetin bolady. Oqytýdyń osyndaı traektorııasy, bilimdi osy jolmen baǵalaý aldymen bizdiń 10 áriptes-kolledjderimizde, sosyn basqa da barlyq tehnıkalyq jáne kásibı bilim beretin júıege tutastaı enetin bolady», - deıdi E. Sádýaqasova.
