Qazaqstanda alǵash ret kóktaıǵaqqa qarsy materıaldardyń ulttyq standarty ázirlendi
ASTANA.KAZINFORM —«Qazaqstan jol ǵylymı-zertteý ınstıtýty» (QazjolǴZI) alǵash ret eldi mekender aýmaǵynda qoldanylatyn kóktaıǵaqqa qarsy materıaldarǵa qoıylatyn talaptardy aıqyndaıtyn ulttyq standart ázirlendi.
Kólik mınıstrligi málimetinshe, qujattyń maqsaty —jaıaý júrginshiler men kólik qozǵalysynyń qaýipsizdigin arttyrý jáne qys mezgilinde reagentterdiń qorshaǵan ortaǵa tıgizetin teris áserin azaıtý.
— Buǵan deıin elde tek GOST 33387-2015 «Jalpy paıdalanymdaǵy avtomobıl joldary. Kóktaıǵaqqa qarsy materıaldar. Tehnıkalyq talaptar» standarty qoldanysta bolǵan. Alaıda onyń qoldanylý aıasy tek jalpy paıdalanymdaǵy avtomobıl joldarymen shektelip, qalalyq ınfraqurylymnyń, kóshelerdiń, trotýarlardyń, aıaldamalardyń jáne jaıaý júrginshiler ótkelderiniń erekshelikterin eskermegen, –dep atap ótti «QazjolǴZI» mamandary.
Sarapshylardyń aıtýynsha, mundaı jaǵdaıda standartty reagentterdi qoldaný jaraqat alý qaýpin arttyryp, jabyndar men abattandyrý elementteriniń buzylýyn jedeldetýi múmkin, sondaı-aq adamdar men úı janýarlarynyń densaýlyǵyna keri áserin tıgizýi yqtımal. Qazaqstan Respýblıkasynyń Ekologııalyq kodeksiniń 238-babynyń 9-tarmaǵyna sáıkes, eldi mekender aýmaǵynda topyraqqa, ósimdikterge jáne ekojúıege zııandy áseri bolǵandyqtan kóktaıǵaqpen kúres maqsatynda as tuzyn qoldanýǵa tyıym salynady. «QazjolǴZI» ázirlegen jańa ulttyq standart qalalyq ortaǵa qaýipsiz kóktaıǵaqqa qarsy materıaldardyń ruqsat etilgen túrlerin, qasıetterin jáne sapa kórsetkishterin aıqyndaıdy.
Qujat halyqaralyq tájirıbeler men elimizde jınaqtalǵan qysqy jol kútimi tájirıbesiniń taldaýy negizinde daıyndalǵan.
Bul standartty engizý qys mezgilindegi kóktaıǵaqpen kúres sharalarynyń tıimdiligin arttyrýǵa, qaýipti reagentterdiń qoldanylýyn boldyrmaýǵa múmkindik beredi.
«QazjolǴZI» mamandarynyń aıtýynsha, standartty ázirleýdiń basty maqsaty — jol qozǵalysynyń qaýipsizdigin arttyrý jáne jol-kólik oqıǵalarynyń sanyn azaıtý.
Aıta keteıik, Aqmola oblysynda kóktaıǵaqqa qaramastan jazǵy dóńgelekpen shyqqan júrgizýshiler joldan qaıtaryldy.