Qazaqstanda alǵash ret kıik múıizderi ashyq túrde joıyldy
ORAL. QazAqparat - Oral qalasy mańynda kıik múıizderi men derıvattary ashyq túrde joıyldy, dep habarlaıdy QazAqparat tilshisi.
Qazaqstan bıoalýantúrliligin saqtaý assotsıatsııasynyń qoǵammen baılanys mamany Muhıt Súttibaevtyń aıtýynsha, kıik múıiziniń zańsyz saýdasyna qarsy mundaı shara Qazaqstanda alǵash ret ótkizilip otyr.
Atalmysh assotsıatsııa bıylǵy aqpan aıynda kıik múıizderi men derıvattaryn ashyq túrde joıý jóninde barlyq oblystardyń ishki ister basqarmalaryna hat joldaǵan bolatyn. Solardyń ishinde bul usynysty birinshi bolyp BQO ishki ister departamenti qabyl aldy.
«Aldaǵy ýaqytta BQO-nyń osy tájirıbesin basqa oblystarǵa taratýdy kózdep otyrmyz. Bul memlekettik organdar jumysynyń ashyqtyǵyn tanytady. Sonymen qatar sońǵy kezde ustalǵan brakonerler arasynda quqyq qorǵaý qyzmetkerleriniń bolýy osy máseleniń óte ózektiligin kórsetedi. Taǵy bir qadap aıtatyn jaıt, kıiktiń derıvattary men múıizderin satýǵa, odan tipti tabıǵat qorǵaý maqsatynda paıda tabýǵa tyıym salynǵan», dedi M.Súttibaev.
Aıta keteıik, shara barysynda 148 múıiz joıyldy. Jalpy, múıizdiń ár kılosynyń «qara bazardaǵy» baǵasy 5 myńnan 9 myńǵa deıingi AQSh dollary aralyǵynda. Sonda 148 múıizdiń jalpy quny shamamen 68-75 mln teńgeni quraıdy.
Osyǵan deıin Batys Qazaqstan oblysynda zańsyz kıik aýlaýmen aınalysqan brakoner ustalǵandyǵyn jazǵanbyz.
