Qazaqstanda alǵash ret karbamıd zaýyty salynady: iri joba maquldandy
ASTANA. KAZINFORM — QR Úkimeti Ónerkásip jáne qurylys mınıstrligi men «KazAzot PRIME» JShS arasyndaǵy Mańǵystaý oblysy aýmaǵynda ammıak-karbamıd keshenin salý jobasy boıynsha ınvestıtsııalar týraly kelisimge qol qoıýdy maquldady. Bul týraly Úkimettiń baspasóz qyzmeti málim etti.
Tıisti qaýlyǵa Premer-mınıstr Oljas Bektenov qol qoıdy.
Elimizdegi alǵashqy karbamıd óndirý zaýyty Aqtaý qalasynda salynady. Jobanyń jalpy ınvestıtsııa kólemi 804,2 mlrd teńgeni quraıdy. Kásiporyndy paıdalanýǵa berý 2030 jylǵa josparlanǵan. Qurylys kezeńinde 1,5 myńǵa jýyq jumys orny, keshen iske qosylǵannan keıin — 700 turaqty jumys orny ashylady.
Bolashaq keshenniń qýattylyǵy jyl saıyn 660 myń tonnaǵa deıin ammıak, 580 myń tonnaǵa jýyq karbamıd jáne 500 myń tonna ammıak selıtrasyn shyǵarýǵa múmkindik beredi.
— Jobany júzege asyrý eldiń agrohımııalyq salasyn damytý úshin strategııalyq mańyzǵa ıe. Búginde karbamıd Qazaqstanda óndirilmeıdi, biraq kórshi elderden ımporttalady. Karbamıd azotty tyńaıtqysh retinde aýyl sharýashylyǵynda ártúrli daqyldarǵa arnalǵan barlyq topyraqtarda negizgi tyńaıtqysh retinde keńinen qoldanylady jáne ishki naryqta suranysqa ıe, — dep habarlady Úkimetten.
Jańa kásiporynnyń iske qosylýy otandyq fermerlerdi óz óndirisiniń ónimimen qamtamasyz etýge, ımportqa táýeldilikti azaıtýǵa jáne eksporttyq áleýetti nyǵaıtýǵa múmkindik beredi.
Qazirgi ýaqytta azotty tyńaıtqyshtardyń jalǵyz otandyq óndirýshisi — «QazAzot» AQ. Elimizde Aqtaý jobasynan basqa, SNPS-Aqtóbemunaıgaz kompanııasymen birlesip, KazESTA jáne KMG PetroChem JShS júzege asyratyn taǵy eki karbamıd óndirý jobasy josparlanǵan. Bul azot tyńaıtqyshtarynyń otandyq óndirisi qýattylyǵyn edáýir arttyrýǵa jáne ımportqa táýeldilikti azaıtýǵa múmkindik beredi.
2030 jylǵa qaraı barlyq ınvestıtsııalyq jobalar iske qosylǵan kezde ammıak ónimin óndirýdiń boljamdy kólemi 2,3 mln tonnaǵa jetedi dep kútilýde. Osy sharalardyń nátıjesinde Qazaqstan otandyq sharýalardyń qajettilikterin tolyq qamtamasyz etip qana qoımaı, eleýli eksporttyq áleýetti qalyptastyra alady.
Atalǵan ammıak pen karbamıd óndiretin zaýyt qurylysy naýryz aıynda bastalǵan bolatyn.
