Qazaqstanda alǵash ret qan komponentterin QR-kod arqyly sáıkestendirý júıesi engizildi
ASTANA. KAZINFORM – QR Densaýlyq saqtaý mınıstrliginiń Respýblıkalyq qan ortalyǵynda qan komponentteriniń japsyrmalarynda QR-kodtardy paıdalanýǵa negizdelgen ScanQAN tsıfrlyq júıesi engizildi.
Jobanyń maqsaty – qan quıý kezindegi qaýipsizdik standarttaryn kúsheıtip, adamı faktorǵa baılanysty qaýipterdi azaıtý.
- Jańa júıe qan komponentterin daıyndaýdan bastap saqtaý, berý jáne patsıentke transfýzııa jasaýǵa deıingi barlyq kezeńde dál ári jedel sáıkestendirýge múmkindik beredi.
QR-kodty skanerleý arqyly medıtsına qyzmetkerleri qan komponenti týraly tolyq aqparatqa qol jetkize alady.
Atap aıtqanda, júıede zerthanalyq zertteý nátıjeleri, saqtaý sharttary, qoldaný erekshelikteri jáne klınıkalyq usynymdar qamtylǵan, - dep jazdy Densaýlyq saqtaý mınıstrliginen.
Mamandardyń aıtýynsha, ScanQAN júıesi dárigerlerge klınıkalyq jaǵdaılarda jyldam sheshim qabyldaýǵa kómektesedi. Sonymen qatar Respýblıkalyq qan ortalyǵynda sapa menedjmentiniń qosymsha tsıfrlyq quraldary engizilgen.
Olardyń qatarynda standartty operatsııalyq rásimder men nusqaýlyqtarǵa jedel qol jetkizýge arnalǵan QR-kodtar, sondaı-aq óndiristik úderistiń krıtıkalyq núktelerin beınemonıtorıngteý júıeleri bar.
Joba patsıentterdiń qaýipsizdigin arttyryp, qan komponentteriniń sapasyn baqylaýdy kúsheıtýge baǵyttalǵan.
Aıta keteıik, Qazaqstanda qan donorlyǵyn damytý jospary pysyqtalyp jatyr.
