Qazaqstanda alǵash ret gık festıvali ótýde
ASTANA. QazAqparat - Astanada kınoındýstrııa, komıks, kıbersport, anımatsııa mádenıetterine arnalǵan «Geek Con Astana 2018» festıvali bastaldy, dep habarlaıdy QazAqparat tilshisi.
Atalǵan mádenı festıval negizinen AQSh (ComicCon), Reseı (ComicCon Russia, Igromır) jáne basqa da shet elderde jyl saıyn ótkiziledi jáne halyq arasynda keńinen tanylǵan. Qazaqstanda tuńǵysh ret uıymdastyrylýda.
Gık mádenıetine arnalǵan sharaǵa Marvel Comics, DC comics, Garrı Potter, Juldyzdy soǵystar, (Zvezdnye Voıny), Dota-2 sekildi álemge tanymal franshızalardyń 2 myńnan asa jankúıerleri jınaldy.
«Bizde endi qolǵa alynǵanymen shetelderde bundaı shara turaqty ótedi jáne aýdıtorııasy keń. Mysaly, AQSh-ta gık festıval aptalap ótedi jáne Gollıvýd fılmderindegi keıipkerlerdi somdaǵan tanymal akterler shaqyrylady. Sharanyń basty ıdeıasy men maqsaty álemde tutas bir janr bolyp tabylatyn kınoındýstrııa, komıks, kıbersport, anımatsııa mádenıetin Qazaqstandada damytý. Sebebi bul óner jáne bizdiń jastardyń qyzyǵýshylyǵy óte joǵary. Biz bolashaqta ózimizdiń otandyq gık mádenıeti ókilderin qalyptastyrǵymyz keledi», - dedi «Geek Con Astana 2018» festıvaliniń uıymdastyrýshysy Ádilhan Saparǵalıev.
«Geek Con Astana 2018» festıvalinde kórermender eki kún boıy oıyn-saýyq baǵdarlamalary, komıks, anımatsııa qurastyrýshylardyń sheberlik sabaqtary, 100-den asa kospleı qatysýshylar, kvest oıyndary, mýzykalyq toptar men sıqyrshylardyń baǵdarlamalary, VR, Playstation, xBox, Dendi, Sega oıyn-saýyqtaryna qatysyp, kóre alady.
Sonymen qatar sharaǵa gık mádenıeti taqyrybyna jazatyn otandyq kitap jáne anımatsııa avtorlary, kompıýter jáne ústel oıynyn qurastyrýshylar qatysýda.
Aıta keteıik, gık mádenıeti degenimiz - zamanaýı zııatkerlik saýyq qurýmen qyzyǵatyn adamdardy biriktiretin sýbmádenıet. Gık mádenıetimen aınalysatyndar nemese qoldaıtyndar qataryna kompıýter jáne ústel oıyndarymen áýestenetinder, odan basqa fantastıka men fentezı janrlary keıipkerlerin oılap tabýshy, qurastyrýshy mamandar jatady.
