Qazaqstanda alǵash ret estetıkalyq toptyq gımnastıkadan Azııa chempıonaty ótedi
ASTANA. KAZINFORM — Elimiz sport tarıhynda alǵash ret estetıkalyq toptyq gımnastıkadan Azııa chempıonatyn ótkizedi. 13-14 maýsym kúnderi Astana qalasynda bul sport túrinen Álem kýbogynyń III kezeńi men Azııa chempıonaty uıymdastyrylady.
Bul týraly OKQ alańynda ótken brıfıngte Astana estetıkalyq toptyq gımnastıka federatsııasynyń prezıdenti Áıgerim Ábdildına málimdedi.
Halyqaralyq deńgeıdegi doda Ulttyq tennıs ortalyǵynyń Beeline Arena kesheninde ótedi. Chempıonattyń saltanatty ashylý rásimi 13 maýsym kúni saǵat 12:00–de bastalady.
Jarysqa Belarýs, Qyrǵyzstan, Qazaqstan, Malaızııa, Reseı, Sıngapýr, AQSh, Fınlıandııa, Estonııa jáne Japonııadan kelgen sportshylar qatysady. Uıymdastyrýshylardyń málimetinshe, týrnırge 400-den astam qatysýshy jınalady. Álem men Azııanyń úzdik 40 komandasy júldeli oryndar úshin synǵa túsedi. «Senorlar» jáne «ıÝnıorlar» sanattary boıynsha alty medal jıyntyǵy sarapqa salynady.
— Estetıkalyq toptyq gımnastıka — tabıǵı, úılesimdi jáne densaýlyqqa qaýipsiz qozǵalystarǵa negizdelgen olımpıadalyq emes buqaralyq sport túri. Bul sportpen 4 jastan bastap aınalysýǵa bolady. Komanda quramynda 6-dan 14-ke deıin sportshy óner kórsetedi. Jarystar uzaq baǵdarlama, qysqa baǵdarlama jáne aralas baǵdarlamalar (qyzdar men uldar) boıynsha ótkiziledi, — dedi Astana estetıkalyq toptyq gımnastıka federatsııasynyń prezıdenti Áıgerim Ábdildına.
Búginde estetıkalyq toptyq gımnastıka elimizdiń 15 óńirinde qarqyndy damyp keledi. Bul sport túrimen 3 myńnan astam sportshy turaqty túrde aınalysady. Ulttyq qurama sapynda 137 gımnast óner kórsetedi.
— Osy ýaqytqa deıin elimizde estetıkalyq toptyq gımnastıka boıynsha 211 halyqaralyq dárejedegi sport sheberi jáne 409 QR sport sheberi daıarlandy. Búginde bul salada 98 jattyqtyrýshy men horeograf eńbek etedi. 2026 jyly Qazaqstannyń estetıkalyq toptyq gımnastıka federatsııasy Qazaqstan Respýblıkasy Týrızm jáne sport mınıstrliginiń akkredıtatsııasynan ótip, Qazaqstan Ulttyq Olımpıadalyq komıtetiniń resmı moıyndaýyna ıe boldy, — dedi ol.
Aıta keteıik, Qazaqstan federatsııasy 2018 jylǵy 24 sáýirden bastap Halyqaralyq estetıkalyq toptyq gımnastıka federatsııasynyń (IFAGG) tolyqqandy múshesi sanalady.
Munan bólek brıfıng barysynda Álem kýbogy men Azııa chempıonatynda el namysyn qorǵaıtyn qazaqstandyq komandalar da tanystyryldy.
Senorlar:
Alan (Astana), LiEl (Almaty), Asyl Tas (Shymkent), Estel (Atyraý), Fiesta (Shymkent).
ıÝnıorlar:
Samruk (Astana), Kerbez (Almaty), Izumrud-Korkem (Astana), Sunrise (Almaty), Alem (Shymkent), Space (Óskemen).
Aralas komandalar:
Libertad, Kerbez Mix, Aeria jáne Diamonds (Almaty).
Eske sala keteıik, kórkem gımnastıkadan da Qazaqstan quramasynyń ókilderi Bishkekte ótip jatqan Azııa chempıonatynda qola júldege ıe boldy.
