Qazaqstanda alǵash ret erekshe balalarǵa arnalǵan anımatsııa mektebi jumysyn bastady

NUR-SULTAN. QazAqparat – Búgin QR Aqparat jáne qoǵamdyq damý mınıstrliginiń bastamasymen Qazaqstan Táýelsizdiginiń 30 jyldyǵyna oraı «Balapan» telearnasynyń janynan «Erekshe bilim berý qajettilikteri bar balalarǵa arnalǵan áleýmettik anımatsııa mektebi jumysyn bastady, dep habarlaıdy QazAqparat vedomstvonyń baspasóz yqzmetine silteme jasap.

Arnaıy joba Ortalyq Azııada alǵash ret júzege asyrylýda. Mektep oqýshylaryna Qazaqstannyń, Japonııanyń, Ońtústik Koreıanyń úzdik mýltıplıkatorlary dáris oqıdy.

Mektep erekshe bilim alý qajettilikteri bar balalardyń áleýmettik beıimdelýine yqpal etetin jańa daǵdylardy úırenýge jáne qabiletin arttyrýǵa múmkindik beredi. Uıymdastyrýshylar áleýmettik qoldaýdan basqa, televızııalyq dızaın salasynda suranysqa ıe mamandardy oqytýdy jáne úzdik túlekterdiń bolashaqta jumysqa ornalasýyna múmkindik jasaýdy kózdeıdi.

«Balapan» telearnasy janyndaǵy mekteptiń taǵy bir ereksheligi, jasóspirimder oqýdan keıin qalyptasqan eresek mamandardan keńes pen qoldaý ala alady. Jobaǵa qatysý úshin 14-16 jas aralyǵyndaǵy 30 bala iriktelip alyndy, olar 2021 jyldyń naýryz-tamyz aılarynda onlaın-formatta oqıdy.

Oqýdyń birinshi aıynda balalar anımatsııa negizderi boıynsha jalpy dáris oqıdy dep josparlanǵan. Ári qaraı qyzyǵýshylyǵy men beıimine qaraı birneshe topqa bólinip oqytylady.

Oqýǵa túsýdiń negizgi talaptary — balalardyń oqýǵa degen yntasy men qyzyǵýshylyǵy, jasóspirimderdiń shyǵarmashylyq áleýeti. Sonymen qatar anımatsııa salý adamǵa fızıkalyq turǵyda kúsh túsirmeıdi.

Búgingi tańda Qazaqstanda anımatsııalyq dızaın salasy qarqyndy damyp keledi. Oqý kýrsy tegin jáne jeke anımatsııalyq stýdııalardyń atsalysýymen qaıyrymdylyq joba retinde júzege asyrylady. «Qazaqstan» teleradıokorporatsııasy balalarǵa oqý úshin qajetti arnaıy planshet pen basqa da tehnıkalyq quralmen qamtamasyz etedi.