Qazaqstanda alǵash ret eki patsıenttiń julynyna jańa neırostımýlıator ornatyldy
ALMATY. KAZINFORM — Qazaqstanda alǵash ret eki patsıenttiń julynyna jańa neırostımýlıator ornatyldy. Operatsııany Almatydaǵy ortalyq qalalyq klınıkalyq aýrýhana dárigerleri jasady.
Almaty qalalyq densaýlyq saqtaý basqarmasy málim etkendeı, quny 8,5 mln teńge turatyn joǵary tehnologııalyq medıtsınalyq qyzmet MÁMS esebinen jasaldy.
Ortalyq qalalyq klınıkalyq aýrýhanasynyń neırohırýrgııa bólimshesiniń meńgerýshisi Marat Almatovtyń sózinshe, omyrtqasy aýyratyn naýqastardyń dertin jeńildetetin zamanaýı neırostımýlıatorlar Qazaqstanda buryn-sońdy qoldanylmaǵan.
«Mundaı stımýlıatorlar omyrtqasy sozylmaly túrde aýyratyn patsıentter úshin taptyrmas qurylǵy. Otadan keıin olar aýrýyn umytyp, birden burynǵy qalypty ómirge oralady. Bul — eń sońǵy úlgidegi, jetildirilgen, aqyldy júıe. Biz buryn ornatyp júrgen qurylǵynyń datchıkteri ýaqyt óte kele aýyrsynýdy basý qabiletinen aıyrylyp qalatyn. Onyń ústine, bul stımýlıator patsıentke avtomatty túrde rettep deneni kez kelgen qalypta ustaýǵa múmkindik beredi. Buǵan deıin emdelýshiler dene qalpyn ózgertkende aýyrsynýdy sezinetin», — deıdi dáriger.
Aıtýynsha, jańa qurylǵyny is júzinde synap kórý baqyty kóp jyldan beri omyrtqanyń degeneratıvti aýrýyna shaldyqqan elimizdiń aımaǵynan kelgen eki turǵynǵa buıyrdy.
«Ekeýine de aımaqta buǵan deıin tórt ret sátsiz operatsııa jasalǵan. Ota 2 saǵatqa sozyldy. Biz neırostımýlıatorlardy shaǵyn tilik arqyly dál julynnyń ústine ornattyq. Patsıent oıanǵannan keıin birden júıeni iske qostyq. Emdelýshilerge arnaıy qosymsha ornatylǵan smartfon beriledi. Ol arqyly qurylǵyny qajet kezde rettep, qosyp nemese óshirýge bolady», — deıdi Marat Almatov.
Jańa júıede «gıroskop» fýnktsııasy bar, baǵdarlama soǵan qosylǵan jáne ony smartfonnyń ne planshettiń kómegimen basqarýǵa bolady.
«Júıeniń taǵy bir artyqshylyǵy — stımýlıator naýqasta ómiriniń sońyna deıin qalady. Patsıent otadan keıin qalypty ómir súrýge múmkindik alady deýge bolady. Vanta SureScan MRI Medtronic Qazaqstanda alǵash ret bizdiń aýrýhanada ornatylǵanyn atap ótkim keledi. Stımýlıatordyń ózi qymbat. Bir jaqsysy bizdiń elde onyń aqysy MÁMS arqyly tólenedi», — deıdi neırohırýrg.
