Qazaqstanda alǵash ret baıanshylar men akkordeonshylardyń álem chempıonaty ótedi
ASTANA. KAZINFORM – 2026 jylǵy 23-27 tamyz aralyǵynda Astanada Qazaqstan men Ortalyq Azııa tarıhynda alǵash ret baıanshylar men akkordeonshylarǵa arnalǵan bedeldi «Coupe Mondiale 79» halyqaralyq baıqaýy ótedi, dep habarlaıdy Roza Baǵlanova atyndaǵy «Qazaqkontsert» memlekettik akademııalyq kontserttik uıymy.
Baıqaý Qazaqstan Respýblıkasy Mádenıet jáne aqparat mınıstrliginiń qoldaýymen Ortalyq kontsert zalynda uıymdastyrylady. Sonymen qatar osy kúnderi Halyqaralyq akkordeonıster konfederatsııasy (Confédération Internationale des Accordéonistes, CIA) delegattarynyń 156-kongresi ótedi.
«Coupe Mondiale» – baıan jáne akkordeon óneri salasyndaǵy álemdegi eń bedeldi ári kóne halyqaralyq baıqaýlardyń biri. Alǵash ret 1938 jyly uıymdastyrylǵan bul doda búginde álemniń túkpir-túkpirinen kelgen úzdik oryndaýshylardyń basyn qosatyn kásibı alańǵa aınalǵan.
Baıqaýǵa halyqaralyq deńgeıdegi mýzykanttar men mádenıet qaıratkerleri qatysady. Sarapshylar 21 elden kelse, qatysýshylar 16 elden ótinim bergen. Olardyń qatarynda Avstralııa, AQSh, Germanııa, Italııa, Frantsııa, Qytaı, Ońtústik Koreıa, Ulybrıtanııa, Túrkııa, Qazaqstan jáne basqa da memleketterdiń ókilderi bar.
«Qazaqstannyń atalǵan halyqaralyq jobany ótkizý quqyǵyna ıe bolýy elimizdiń mádenı áleýetiniń joǵary deńgeıde moıyndalǵanyn kórsetedi. Bul is-shara Astananyń halyqaralyq mádenı dıalog ortalyǵy retindegi mártebesin nyǵaıtyp, Qazaqstannyń álemdik mádenı keńistiktegi bedelin arttyrýǵa múmkindik beredi», – delingen habarlamada.
Baıqaý aıasynda CIA prezıdenti Mırko Patarını, vıtse-prezıdentter Lı Tsong pen Zorıtsa Karakýtovska, bas hatshy Kımmo Mattıla, bas menedjer Harlı Djons, bas ambassador Kevın Frıdrıh jáne konfederatsııanyń basqa da jetekshileri Astanaǵa keledi.
23 tamyzda qatysýshylardyń jerebe tartý rásimi ótse, 24 tamyzda baıqaýdyń saltanatty ashylýy uıymdastyrylady. 25–27 tamyz aralyǵynda konkýrs tyńdaýlary, shyǵarmashylyq sheberlik sabaqtary, kontsertter, baspasóz máslıhaty, jeńimpazdardy marapattaý jáne jabylý saltanaty ótedi.
25 tamyzda «Coupe Mondiale 74» halyqaralyq baıqaýynyń jeńimpazy, qazaqstandyq baıanshy Oljas Nurlanovtyń jeke kontserti josparlanǵan. Al 26 tamyzda «Saz & Soul» mýzykalyq ujymy men «Samǵa» kvartetiniń qatysýymen «Tango» kontserttik baǵdarlamasy usynylady.
Aıta keteıik, elordada Ortalyq Azııadaǵy eń iri pop-mádenıet festıvali bastaldy.
