Qazaqstanda alǵash ret balanyń baýyry men júregine bir ýaqytta ota jasaldy

ASTANA. KAZINFORM — Ony Ana men bala ulttyq ortalyǵynyń dárigerleri sheteldik tájirıbege súıene otyryp iske asyrdy.

Ota kezinde aldymen naýqastyń baýyrynyń oń jaq bóligindegi, keıin birden qan tamyryndaǵy isik alynǵan.

«Bul — asa sırek kezdesetin jaǵdaı» deıdi dárigerler. Álem boıynsha bundaı operatsııa nebári on ret jasalǵan.

Dastan Rústemov — balalar hırýrgy. Onyń osy salada júrgenine 14 jylǵa taıady.

Tájirıbeli dáriger osy aralyqta aýyr haldegi júzdegen balany qulan-taza aıyqtyrdy. Talaı márte kúrdeli ota jasap, san túrli dertke daýa tapty.

Alaıda, jaqynda ol álemde asa sırek kezdesetin jaǵdaımen betpe-bet keldi. Obyrǵa shaldyqqan bir jarym jasar balanyń búıregindegi isigi asqynyp, júrekke shapqan.

Balany qutqarýdyń jalǵyz joly — eki múshege qatar ota jasaý bolatyn. Sondyqtan dárigerler konsılıýmy jasandy qan aınalymyn ornatýǵa sheshim qabyldady.

ıAǵnı, júrekke tútik ornatyp, baýyrdyń oń jaq bóligin jáne qan tamyrlardaǵy isikti alǵan.

— Balanyń denesin 20 gradýsqa deıin tońazytyp, qan aınalymyn toqtatyp, 20 mınýttaı júregin ashyp júrek jaqtan baýyr jaqtan qan tamyrda isigin alyp, sosyn júrektiń syrtyndaǵy qabyǵy perıkart dep atalady. Sodan kesip alyp, sol jerde óziniń júrek qabymen jamap tiktik. Baýyrdyń ózinde bolsa, onyń zaqymdalǵan jerin kesip alyp tastar edik, — deıdi UMC Ana men bala ortalyǵynyń departament dırektory, balalar hırýrgy Dastan Rústemov.  

Ota segiz saǵatqa sozylǵan. Oǵan medıtsına qyzmetkerleriniń eki brıgadasy jumyldyryldy.

Qazir balanyń jaǵdaıy jaqsy. Dárigerler ony udaıy baqylaýda ustap otyr.

— Bala aýrýhanaǵa qańtarda ákelindi. Osy ýaqytqa deıin birneshe hımıoterapııadan ótti. Sonyń arqasynda qaterli isik áldeqaıda kishireıdi. Degenmen tolyq aıyǵyp ketýine ota qajet boldy. Qýanyshymyzǵa oraı, bári sátti ótti. Búldirshin osydan eki kún buryn aýrýhanadan shyǵyp, úıine oraldy. Biraq jaǵdaıyn qadaǵalap otyramyz, — dep atap ótti balalar kardıohırýrgy Ǵalymjan Ótegenov. 

Ana men bala ulttyq ortalyǵynda osyǵan deıin jıyrmadan astam baýyr transplantatsııasy jasalǵan.

Biraq, otandyq dárigerlerdiń tájirıbesinde baýyr men júrekke bir ýaqytta ota jasaý buryn-sońdy bolmaǵan.

Óıtkeni obyrdyń bul túrine álem boıynsha 10 naýqas qana shaldyqqan.