Qazaqstanda alǵash ret balamaly energııa kózderi boıynsha aýktsıondar ótti

QR Energetıka vıtse-mınıstri Maxambet Dosmuxambetovtiń aıtýynsha, birinshi aýktsıondarǵa otandyq kompanııalar ǵana emes, sheteldik ınvestorlar da qatysty. "Kúni keshe ǵana balamaly energııa kózderi boıynsha kóktemgi aýktsıondar aıaqtaldy. 10 aýktsıonnyń 8-i sátti ótti. Saýda-sattyqqa otandyq kompanııalar ǵana emes, sheteldik ınvestorlar da qatysty. Barlyǵy - 42 kompanııa. Olardyń ishinde Qazaqstan, Reseı, Frantsııa, Bolgarııa, Túrkııa men Qytaıdyń ókilderi bar. Biz alǵash ret xalyqaralyq saýda-sattyqty elektrondy formatta ótkizdik. Qytysýshylar 960 MVt energııany óndirýge daıyn ekenin jetkizdi. Atalǵan kórsetkish alǵashqy jospardan tórt esege artyq bolyp tur", - dedi M.Dosmuxambetov búgin balamaly energııa kózderin damytýǵa arnalǵan sammıtte.

Onyń aıtýynsha, ınvestorlar tarapynan Qazaqstanda balamaly energııa nysandaryn salýǵa degen qyzyǵýshylyq joǵary bolǵannan keıin atalǵan qýat kózderiniń tarıfteri tómendedi. "Máselen, jel elektr stansylarynyń tarıfteri 20 protsentke, shaǵyn sý elektr stansylarynyń tarıfteri 23 protsentke, al kún elektr stansylarynyń tarıfteri 25 protsentke tústi. Qazirdiń ózinde 19 kompanııa balamaly energııa kózderin satyp alýshy biryńǵaı kompanııamen kelisimshartqa otyryp, 194 MVt energııany óndirýge daıyn. Búginde kúzgi aýktsıondarǵa daıyndyq jumystary bastalyp ketti. Atalǵan aýktsıondar qazan aıynda uıymdastyrylady", - dep atap kórsetti M.Dosmuxambetov.
 

Aıta keteıik, buǵan deıin "Korem" AQ tóraǵasynyń orynbasary Erjan Mádıev aýktsıonnyń qalaı jáne ne úshin ótkiziletinin túsindirgen bolatyn. Onyń aıtýynsha, aldymen mınıstrlik saıtynda arnaıy keste jarııalanady. Onda satyp alynatyn energııanyń kólemi, kún, jel men sý elektr stansylary salynatyn aımaqtar, sondaı-aq shekti tarıfter kórsetiledi. Osy kásipke qyzyǵýshylyq bildirgen ınvestorlar qajetti qujattardy jınap, aýktsıonǵa qatysýǵa ótinim bere alady. Dál sol aýktsıonda balamaly energııany eń arzan tarıfpen satamyn degen qatysýshy jeńimpaz atanady. Sóıtip, kún, jel, ıa bolmasa, sý elektr stansasyn salyp, sol jerde óndirgen energııany memleketke sata alady. "Aýktsıon jabyq úlgide ótedi. Ótinish bergender bir-birin kóre almaıdy. Biz olardyń ishinen eń arzan tarıf belgilegen kompanııany tańdap, onyń usynǵan jobasyn satyp alamyz. Sheteldik ınvestorlar tarapynan qyzyǵýshylyq bar. Aldaǵy ýaqytta aýktsıondar jylyna eki ret ótkiziledi. Kóktemde shaǵyn jobalarǵa aýktsıondar uıymdastyrylsa, kúzde iri jobalarǵa aýktsıondar ótkiziledi degen jospar bar. Іri jobalarǵa sheteldik ınvestorlar kelýi tıis", - dedi E.Mádıev QazAqparat tilshisine bergen suxbatynda.

Al QR Energetıka mınıstri Qanat Bozymbaevtyń aıtýynsha, BEK jobalaryna jer telimin berý jaǵynan jeńildik jasalady.