Qazaqstanda alǵash ret balalarǵa neıromodýlıatsııa otasy jasaldy
ALMATY. KAZINFORM — Almaty Balalar shuǵyl medıtsınalyq kómek kórsetý ortalyǵy bazasynda eki biregeı ota jasaldy. Endi otandyq ýrologtar men neırohırýrgtar birigip, qýyq qyzmetinde aqaýy bar balalarǵa kómektesetin bolady. Bul týraly Densaýlyq saqtaý mınıstrligi málim etti.
Bul — bel aımaǵyna neırostımýlıator-ımplant ornatý arqyly júrgiziletin ota, qurylǵy ótkizgish arqyly sakraldy júıkemen baılanysady. Generator álsiz elektr ımpýlsin jiberip, júıkeni yntalandyrady. Nátıjesinde yntalandyrýshy qýyqtyń jumysyn baqylaýǵa kómektesedi.
– Qazaqstanda balalarǵa mundaı ota buryn-sońdy jasalmaǵan. Al sheteldik áriptesterimiz neıromodýlıatsııany kópten beri qoldanyp keledi. Onyń basty maqsaty – balalardyń ómir súrý sapasyn jaqsartý, – dedi ortalyqtyń neırohırýrgııa bólimshesiniń meńgerýshisi Rahym Aıdaruly.
Pılottyq otany almatylyq dárigerler Belarýs elinen kelgen neıromodýlıatsııa jáne fýnktsıonaldyq neırohırýrgııa salasynyń sarapshysy Vladımır Alekseevetspen birlesip jasady.
– Naýqastardyń biri buǵan deıin irińdi paraproktıtpen aýyrǵan, ókinishke qaraı, onyń saldary retinde atonııalyq qýyq damydy – bul organnyń bulshyq etteriniń álsireýin bildiredi, – dep túsindirdi dáriger.
– Eger bala sırek zár shyǵarsa, bul keıinnen zár reflıýksi men irińdi pıelonefrıt sııaqty aýyr asqynýlarǵa alyp kelýi múmkin. Máseleni sheshý úshin sakraldy elektrod pen neırostımýlıatordy ornatý týraly sheshim qabyldandy – balany bul dertten qutqarýǵa áreket jasap kóremiz. Aıtarym, mundaı dıagnoz kezinde bul – qolda bar sońǵy emdeý ádisi. Qazir jambas aǵzalarynyń jumysyn qalpyna keltiretin basqa ádis joq», – dep naqtylady neırohırýrg Vladımır Alekseevets.
Ekinshi jaǵdaı – julyn jaryǵy bar, zár men nájisti ustaı almaıtyn 9 jastaǵy bala.
Ota eki naýqasqa da ómir sapasyn jaqsartý jáne áleýmettený úshin jasaldy – olar mektepke baryp, qurdastarymen erkin aralasýy tıis.
Nesepti ustaı almaý jaǵdaıynda sakraldy stımýlıatsııa» taqyrybyndaǵy búgingi master-klass – balalar neırohırýrgııasy men ýrologııasy salasyndaǵy naǵyz serpilis. Balalar shuǵyl medıtsınalyq kómek kórsetý ortalyǵynyń dárigerleri bul ádisti tájirıbege engizip, kishkentaı naýqastardyń deni saý bolyp ósýine kómektesýdi josparlap otyr.
Eske sala keteıik, buǵan deıin Mańǵystaýlyq dárigerler júkti áıeldiń júregine ota jasap, ana men balany aman alyp qalǵan edi.