Qazaqstanda alǵash ret «At sportyndaǵy veterınarııa» mamandyǵy ashylady

ALMATY. KAZINFORM – Astanada ótetin 5-shi Dúnıejúzilik kóshpendiler oıyndaryna daıyndyq aıasynda Qazaq ulttyq agrarlyq zertteý ýnıversıtetiniń bazasynda «Qazaqstan Respýblıkasynda at sporty jáne ulttyq jylqy sharýashylyǵynyń qazirgi jaǵdaıy jáne damý bolashaǵy» taqyrybyndaǵy respýblıkalyq dóńgelek ústel ótti.

Jıynda QR Ulttyq ǵylym akademııasynyń prezıdenti Aqylbek Kúrishbaev elimizde ulttyq sport túrleri qarqyndy damyp kele jatqanyn atap ótti.

«At sportynda jylqylardyń saýlyǵyn baqylaý, ratsıonaldy azyqtandyrylýyn qadaǵalaý, kútip-baptaýdy durys uıymdastyrý jáne ınfektsııalyq aýrýlarǵa qarsy ýaqytyly ekpe jasaý – tikeleı veterınarııalyq dárigerlerdiń mindeti. At sportyn álemdik deńgeıge shyǵarý baǵytynda kásibı mamandardy, sonyń ishinde jylqy baptaý jónindegi veterınarlardy daıyndaýdyń jetispeýi – kúrdeli máselelerdiń biri bolyp otyr. Osyǵan oraı, 2024-2025 oqý jylynan bastap, bizdiń ýnıversıtette «At sportyndaǵy veterınarııa» mamandaryn daıyndaý elimizde birinshi ret júzege asyrylmaq», – dedi Aqylbek Kúrishbaev.

Basqosýda ulttyq jylqy sportyn damytýǵa qatysty jınaqtalǵan usynystardy joǵary memlekettik organdar tarapyna joldaý týraly sheshim qabyldandy.