Qazaqstanda alǵash ret Analar kúni toılanyp jatyr

ASTANA. KAZINFORM — Analar kúni — álemniń kóptegen elderinde anaǵa qurmet kórsetip, onyń meıirimi men qamqorlyǵy úshin alǵys aıtý maqsatynda atap ótiletin mańyzdy mereke. Osyǵan oraı Mádenıet jáne aqparat mınıstrligi elimizdegi jańa merekege sholý jasady. 

Mereke mamyr aıynyń ekinshi jeksenbisinde álemniń 20-dan astam elinde toılanady.

Olardyń qatarynda AQSh, Kanada, Germanııa, Italııa, Belgııa, Danııa, Fınlıandııa, Estonııa, Túrkııa, Japonııa, Brazılııa jáne Aýstralııa bar.

Al bulardan bólek elder bul merekeni basqa kúni atap ótedi. 2024 jyly bul mereke Qazaqstanda 12 mamyrda alǵash ret toılanyp otyr. 

Anany qorǵaý — memlekettegi áleýmettik saıasattyń basym mindetteriniń biri.

«Shyn máninde, árbir adam úshin anadan uly, anadan qymbat eshkim joq. Eń qasterli qundylyqtarymyz „Jer-ana“, „Otan-ana“ uǵymdarymen tyǵyz baılanysty. „Ata uldy, ana ultty tárbıeleıdi“ deıdi. Bul sózdiń aıryqsha mán-mańyzy bar», — degen edi Memleket basshysy Qasym-Jomart Toqaev.

Bizdiń otbasylyq ómirimizde de, qoǵamdyq ómirimizde de ananyń róli erekshe, ol balalaryn tárbıelep, baǵyt-baǵdar beredi.

Ananyń eńbegi árdaıym joǵary baǵalanady.

Eldi mekenderde balalar men jastardy tárbıelep, ulttyq qundylyqtardy jańǵyrtý máselesin sheshý úshin, Qazaqstandaǵy áıelderin biriktiretin Qazaqstan halqy Assambleıasynyń «Analar keńesi» jumys isteıdi.

Qazirgi ýaqytta Respýblıkalyq analar keńesinde eldiń oblystyq, qalalyq, aýdandyq, aýyldyq deńgeılerinde 1713 bólimshe bar (onyń ishinde 17 oblystyq, 56 qalalyq, 159 aýdandyq, 1481 aýyldyq jáne etnomádenı birlestikter janynda), olardyń quramyna 16051 áıel kiredi.

6 mamyr men 12 mamyr aralyǵynda barlyq óńirde 600-den astam túrli is-shara ótti.

Jalpy, Analar kúnin merekeleý ananyń qoǵamdaǵy rólin arttyrýǵa, ár azamattyń ata-anasyna qurmet kórsetip, alǵys aıta bilýge tárbıeleý, jastardyń rýhanı-adamgershilik qasıetterin qalyptastyrýǵa, otbasy ınstıtýtyn saqtaýǵa jáne nyǵaıtýǵa baǵyttalady.