Qazaqstanda alǵash ret «aqyldy qoıma» ashylady
ASTANA. QazAqparat - Atalǵan jobany «Qazaqstan temir joly» ulttyq kompanııasy iske asyrmaqshy, dep xabarlaıdy QazAqparat tilshisi.
«Bıyl biz alǵash ret «aqyldy qoımany» iske qosatyn bolamyz. Atalǵan qoımalar «A» sanatyna jatady. Ondaı jerde aldymen HP, Aser sııaqty joǵary aqparattyq texnologııalarmen aınalysatyn kompanııalarǵa qyzmet kórsetiledi. Solardyń tranzıttik júkteri saqtalady», - dedi «QTJ» prezıdenti Qanat Alpysbaev búgin otandyq kólik-logıstıka keshenin damytý máselelerine arnalǵan respýblıkalyq keńeste.
Kompanııa basshysynyń sózine qaraǵanda, ótken jyly Qazaqstan arqyly tasymaldanǵan tranzıttik júkterdiń kólemi 16 mln tonnaǵa jetti. Bul aldyńǵy jylmen salystyrǵanda 26 protsentke artyq.
«Bıyl, kem degende, 500 myń konteıner ótedi degen jospar bar. Árıne, atalǵan tasymalǵa «Qytaı-Eýropa-Qytaı» baǵyty oń septigin tıgizip otyr. Byltyr osy marshrýtpen 200 myńnan astam konteıner tasymaldandy», - dep atap kórsetti Q.Alpysbaev.
Aıta keteıik, búgingi keńes kezinde QR Premer-Mınıstriniń birinshi orynbasary Asqar Mamın konteınerlik tranzıtti ózge elderde uıymdastyrý máselesine basa nazar aýdardy. Al QR Investıtsııalar jáne damý mınıstri Jeńis Qasymbek aýyl joldaryn jóndeýge qatysty josparlarmen bólisti.
