Qazaqstanda alǵash ret 1-11 synyptarǵa arnalǵan qazaq tiliniń deńgeılik oqýlyqtary shyǵaryldy - BǴM
ASTANA. QazAqparat - Bilim jáne ǵylym mınıstrligi Qazaqstanda alǵash ret jańa ádisteme boıynsha 1-11 synyptarǵa arnalǵan balamasyz qazaq tiliniń deńgeılik oqýlyqtaryn shyǵardy. Bul týraly búgin Májiliste oqýlyqtardyń sapasy jáne bilim berý uıymdaryn oqýlyqtarmen qamtamasyz etýge arnalǵan Úkimet saǵatynda Bilim jáne ǵylym mınıstri Aslan Sárinjipov málimdedi.
«Kóptildilik bilim berý modeli qalyptasty. Qazaq, orys jáne aǵylshyn tilderine oqytý úlgisi bilimniń aralyq deńgeılerin qamtıtyn bolady. Osyǵan oraı, alǵash ret Qazaqstanda 1-11 synyptarǵa arnalǵan qazaq tiliniń deńgeılik oqýlyqtary daıyndalyp otyr. Jańa oqýlyqty biz búgin depýtattarǵa da taratyp berdik, bul jańa ádisteme boıynsha ázirlengen balamasy joq oqýlyqtar», - deıdi mınıstr. Onyń aıtýynsha, ár synypqa arnalǵan ádistemelik jıyntyq oqýlyqtan, muǵalimniń ádistemelik quralynan, jumys dápterlerinen, dıdaktıkalyq materıaldar jınaǵy men sózdikten turady. Sonymen qatar oqýlyq salmaǵyn azaıtý maqsatynda 1-2 synyp oqýshylary úshin ár toqsanǵa bólek jumys dápteriniń tórt túri engizilgen. Al 3-4 synyptarda jumys dápteriniń eki túri bolady. «Búgingi kúni osy oqýlyqtardyń jáne olardyń jıyntyqtarynyń maketteri respýblıkalyq ǵylymı-tájirıbelik ortalyqta saraptamadan ótýde. Biz osy oqýlyqtardy aldaǵy qyrkúıekte synaqtan ótkizýdi josparlaımyz. Sodan keıin bir jyl ishinde barlyq kemshilikter joıylǵannan keıin, biz búkil mektepterdiń 1-11 synyptarynda oqýlyqtardy deńgeılik oqýlyqtarǵa almastyrýdy josparlaımyz. Aıta keterligi, búgingi kúni qazaq tili boıynsha deńgeılik oqý baǵdarlamasy bekitilip, biraq oqýlyqtar basyp shyǵarylmaǵan bolatyn. Osy másele qazir tolyǵymen sheshilip otyr», - dedi A.Sárinjipov. Onyń sózine qaraǵanda, atalmysh deńgeılik júıe oqýshylardyń memlekettik tildi meńgerýine septigin tıgizetin bolady.
