Qazaqstanda áleýmettik jeli qoldanýshylarynyń jasyn rastaý tetikteri ázirlenip jatyr
ASTANA. KAZINFORM – 16 jasqa deıingi balalardyń onlaın-platformalarda tirkelýin shekteý úshin paıdalanýshynyń jasyn anyqtaıtyn tehnıkalyq jáne uıymdastyrýshylyq sheshimder qarastyrylyp jatyr. Bul týraly QR Mádenıet jáne aqparat mınıstrligi Kazinform agenttiginiń resmı saýalyna bergen jaýabynda aıtty.
Mınıstrliktiń málimetinshe, bul jumys memlekettik organdar men onlaın-platformalar ókilderimen birlesip júrgizilip jatyr.
– Halyqaralyq tájirıbe negizinde memlekettik organdar men onlaın-platformalardyń ókilderi zańnama talaptaryn iske asyrý úshin qajetti tehnıkalyq jáne uıymdastyrýshylyq tetikterdi ázirlep jatyr. Onyń ishinde paıdalanýshylardyń jasyn verıfıkatsııalaý ádisteri, derekterin rastaý tártibi jáne ózge de qajetti quraldar qarastyrylǵan, - dep habarlady mınıstrlik.
Vedomstvonyń málimetinshe, zań jobasynda jedel habar almasý servısterin qospaǵanda, 16 jasqa deıingi paıdalanýshylardy onlaın-platformalarda tirkeýge shekteý qoıý kózdelgen.
Mınıstrlik bul shara balalardy tsıfrlyq keńistiktegi qaýipterden qorǵaýǵa baǵyttalǵanyn atap ótti.
Aıta keteıik, qazir Úkimettiń qaraýynda jatqan zań jobasynda jedel habar almasý servısterin qospaǵanda, 16 jasqa deıingi paıdalanýshylardy onlaın-platformalarda tirkeýge tyıym salý kózdelgen.
Buǵan deıin Ulybrıtanııada 16 jasqa tolmaǵandarǵa Snapchat, TikTok, YouTube, Instagram, Facebook jáne X sııaqty platformalarǵa kirýge tyıym salynatyny jaıly jazdyq. Shekteý 2027 jyldyń kókteminde kúshine enedi dep josparlanyp otyr.
Aıta keteıik, Qazaqstanda 16 jasqa deıingi jasóspirimderdiń áleýmettik jelilerde tirkelýine qatysty ázirlenip jatqan zań jobasynda birneshe eldiń tájirıbesi eskerilgen.
