Qazaqstanda áleýmettik mańyzy bar ónimderdiń baǵasy tómendeýde

ASTANA. KAZINFORM – Jyl basynan beri 21 mamyrǵa deıin respýblıkada áleýmettik mańyzy bar ónimder baǵasynyń ósýi 0,2%-ǵa deıin baıaýlady. Ótken aptada kórsetkish – 0,1% qurady.

Áleýmettik mańyzy bar ónimderdiń qazirgi baǵasy qatysty jaǵdaı 25 mamyr, senbi kúni Úkimette vıtse-premer Serik Jumanǵarınniń tóraǵalyǵymen ótken kezekti keńeste qaraldy.

Bir apta ishinde qyryqqabat birden 10,4%-ǵa arzandady, oǵan Túrkistan oblysynda jańa ónim alý áser etken. Saýda jáne ıntegratsııa birinshi vıtse-mınıstri Aıjan Bıjanova atap ótkendeı, qyryqqabatty satyp alýǵa saýda jelileri qosyldy, ishki naryq jappaı tolyǵyp jatyr.

Kúnbaǵys maıy (-0,6%), qaraqumyq jarmasy (-0,4%), S1 sanatyndaǵy taýyq jumyrtqasy (-1,4%) baǵasynyń tómendeýi jalǵasýda. Sonymen qatar «tómen baǵalar» tobynda súzbe (-0,2%), taýyq eti (-0,2%), aıran maılylyǵy 2,5% (-0,4%), tuz (-0,1%) jáne 1 surypty bıdaı uny (-0,1%) bar.

Aýyl sharýashylyǵy mınıstrligi tarapynan turaqtandyrý qorlaryndaǵy kókónis qorlarynyń kólemi boıynsha derekter aıtyldy. Óńirlerge kúzgi ónimdi kelesi maýsymaralyq kezeńge jetkizýge forvardtyq sharttar jasasý boıynsha jumys júrgizý tapsyryldy.

Serik Jumanǵarın óńirlerge aldaǵy apta ishinde baǵany turaqtandyrýdy qamtamasyz etýdi jáne qajetti kólemde jańa ónim jetkizýdi jedeldetýdi tapsyrdy.