Qazaqstanda «Áleýmettik qorǵaý júıesiniń úzdik qyzmetkeri» respýblıkalyq baıqaýy bastaldy
ASTANA. KAZINFORM — Qazaqstanda «Áleýmettik qorǵaý júıesiniń úzdik qyzmetkeri jáne úzdik áleýmettik joba» respýblıkalyq baıqaýy bastaldy. Bul týraly Eńbek jáne halyqty áleýmettik qorǵaý mınıstrligi málim etti.
QR Eńbek jáne halyqty áleýmettik qorǵaý mınıstrligi «Áleýmettik qorǵaý júıesiniń úzdik qyzmetkeri jáne úzdik áleýmettik joba» respýblıkalyq baıqaýyna qatysýǵa ótinimderdi qabyldaý bastalǵanyn habarlaıdy. Baıqaý halyqty áleýmettik qorǵaý júıesin damytýǵa jáne ómir súrý sapasyn arttyrýǵa eleýli úles qosyp júrgen kórnekti mamandar men ınnovatsııalyq bastamalardy anyqtaý jáne yntalandyrýǵa baǵyttalǵan. Negizgi maqsat — áleýmettik qyzmetkerler mamandyǵynyń bedelin arttyrý, ozyq tájirıbeni engizýdi yntalandyrý jáne áleýmettik qyzmet kórsetý salasyndaǵy ozyq tájirıbeni taratý.
Baıqaý áleýmettik jumystyń negizgi baǵyttaryn qamtıtyn jeti nomınatsııa boıynsha ótkiziledi:
— «Arnaýly áleýmettik qyzmetter kórsetý ortalyǵynyń úzdik áleýmettik qyzmetkeri»;
— «Úıde kútim kórsetý uıymynyń úzdik áleýmettik qyzmetkeri»;
— «Úzdik memlekettik áleýmettik ınspektor»;
— «Úzdik medıtsınalyq-áleýmettik saraptama qyzmetkeri»;
— «Úzdik áleýmettik pedagog» (arnaýly áleýmettik qyzmet kórsetý júıesinde);
— «Eńbek mobıldiligi ortalyǵynyń (mansap ortalyǵy) úzdik qyzmetkeri»;
— «Úzdik áleýmettik joba».
Baıqaý erejesine sáıkes qatysýshylar konkýrstyq ótinimdi, prezentatsııa materıaldaryn jáne jumystary nemese jobasy týraly qysqasha beınerolıkti daıyndaýy kerek.
Ótinimderdi 2025 jyldyń 1 tamyzy men 30 qyrkúıegi aralyǵynda www.qamqor.enbek.kz onlaın platformasy arqyly berýge bolady.
Baıqaý eki kezeńde ótedi: oblystyq jáne respýblıkalyq. Arnaıy komıssııa ashyqtyq pen obektıvtilik qaǵıdattaryn saqtaı otyryp, birneshe nomınatsııalar boıynsha jeńimpazdardy anyqtaıdy.
Sonymen qatar, elektrondy tsıfrlyq qoltańbany paıdalana otyryp, platformada qoǵamdyq onlaın daýys berý júrgiziledi. Onyń nátıjeleri jeńimpazdardy tańdaý kezinde eskeriledi.
Sonymen qatar, baıqaý aıasynda «Áleýmettik qyzmetkerdiń bir kúni», «Meıirim shýaǵy», «Áleýmettik ıdeıa» jáne «Áleýmettik qyzmetkerge alǵys» taqyryptarynda #Áleýmettikfleshmob, #SotsıalnyıFleshmob birtutas heshtegimen birqatar áleýmettik chellendjder júrgiziledi.
Baıqaý nátıjeleri Áleýmettik qyzmetkerler kúni qarsańynda — 2025 jylǵy 24 qazanda Astana qalasynda ótetin marapattaý rásiminde jarııalanady.
QR Eńbek jáne halyqty áleýmettik qorǵaý mınıstrligi barlyq múddeli mamandar men uıymdardy baıqaýǵa belsendi qatysýǵa, óz jetistikterin kórsetýge jáne elimizdiń áleýmettik salasynyń damýyna úles qosýǵa shaqyrady.
Baıqaýǵa qatysý boıynsha keńes alý úshin 1414 telefony boıynsha baılanys ortalyǵy jumys isteıdi.
Aıta keteıik, jaqynda qaıtarymsyz grant bólý boıynsha ótinimder qabyldaýdyń 2-shi kezeńi bastalady.