Qazaqstanda áleýmettik qoldaý krıterııleri jańartyldy: qandaı otbasylarǵa kómek kórsetilmeıdi
ASTANA. KAZINFORM – Qazaqstanda áleýmettik kómek taǵaıyndaýdyń jańa tártibi engiziledi. Biryńǵaı áleýmettik qoldaý sharalary standartyna sáıkes, otbasylardyń muqtajdyq deńgeıi endi tsıfrlyq otbasy kartasyndaǵy derekter negizinde avtomatty túrde jáne jańartylǵan krıterııler boıynsha aıqyndalatyn bolady.
Bul týraly Kazinform agenttiginiń resmı saýalyna jaýap bergen Eńbek jáne halyqty áleýmettik qorǵaý mınıstrligi habarlady.
Mınıstrlik málim etkendeı, memlekettik qoldaý sharalary azamattardyń muqtajdyq deńgeıin eskere otyryp taǵaıyndalady. Bul esepteýler úshin skorıngtik úlgi qoldanylady. Atalǵan úlgige sáıkes, otbasylardyń ál-aýqaty alty deńgeıge bólinedi – asa muqtajdyq (azyq-túlikke qarajattyń jetispeýi) deńgeıinen bastap joǵary ál-aýqatqa (materıaldyq qıyndyqtardyń bolmaýy) deıin.
Skorıngtik úshgi otbasylardyń turmys deńgeıin keshendi túrde baǵalaıdy. Baǵalaý kezinde kelesi kórsetkishter eskeriledi:
– Materıaldyq jáne materıaldyq emes kórsetkishter;
– Asyraýyndaǵy adamnyń júktemesi;
– Ózin-ózi iske asyrý qabileti;
– Jasyryn tabystar.
– Materıaldyq kórsetkishterge kiris, turǵyn úı, múlik, kólik, nesıeler jatady. Materıaldyq emes kórsetkishterge densaýlyq jaǵdaıy, múgedektik, bilim deńgeıi kiredi. Asyraýyndaǵy adamdardyń júktemesi – jumys isteıtin jáne istemeıtin otbasy músheleriniń qatynasy arqyly baǵalanady. Jasyryn tabystarǵa beıresmı jumystan alynatyn kirister mysal bola alady, – dep túsindirdi mınıstrlik Kazinform tilshisiniń saýalyna bergen jaýabynda.
Baǵalaý protsesi azamattyń qatysýynsyz júrgiziledi. Atap aıtqanda, júıe avtomatty túrde derekterdi taldap, naqty muqtaj jandardy anyqtaıdy. Qazir bul úlgi Shymkent qalasy men Qaraǵandy oblysynda synaqtan ótip jatyr.
Pılottyq joba aıasynda skorıngtik úlgi negizinde tórt memlekettik qyzmet boıynsha tólemder taǵaıyndalǵan:
– Úı jaǵdaıynda bilim alatyn múmkindigi shekteýli balalardyń oqý shyǵyndaryn óteý – 1 255 adam;
– Bilim berý uıymdarynyń oqýshylary men tárbıelenýshilerine qarjylaı jáne materıaldyq kómek kórsetý – 22 382 adam;
– Jeke turǵyn úı qorynan jalǵa alynǵan baspana úshin tólenetin jaldaý aqysyn sýbsıdııalaý – 1 478 otbasy;
– Turǵyn úı kómegin taǵaıyndaý – 1 730 qyzmet kórsetildi.
– Jalpy, bul úlgi azamattardyń muqtajdyq deńgeıin obektıvti túrde anyqtaýǵa, qıyn ómirlik jaǵdaıda qalǵan otbasylardy anyqtap, olarǵa eń tıimdi qoldaý sharalaryn tańdaýǵa múmkindik beredi. Mundaı tásil áleýmettik kómekti jekeshelendirýge, onyń tıimdiligin arttyrýǵa jáne memlekettik tólemderge táýeldiliktiń aldyn alýǵa baǵyttalǵan, – dep atap ótti mınıstrlikten.
Buǵan deıin jyl basynan beri Qazaqstanda halyqty áleýmettik qoldaýǵa 3,4 trln teńge baǵyttaldy, tólemder 4,5 mln adamdy qamtyǵanyn jazǵanbyz.
Eske salsaq, 2024 jyly memleketimiz Prezıdent Qasym-Jomart Toqaevtyń Joldaýynda belgilengen áleýmettik ózgertý baǵyttaryn jalǵastyrdy. Elimizdiń ekonomıkalyq strategııasynyń negizi – azamattardyń ál-aýqatyn jaqsartý. Bul áleýmettik qoldaý men reformalardyń mańyzdy sharalarynda kórinis tabady.