Elimizde áleýmettik qyzmet kórsetýge biryńǵaı talap belgilendi
ASTANA. KAZINFORM — Biryńǵaı memlekettik standarttar elimizdiń barlyq óńirinde áleýmettik qyzmetterdiń sapasyn qamtamasyz etedi, dep habarlaıdy Eńbek jáne halyqty áleýmettik qorǵaý mınıstrliginiń baspasóz qyzmeti.
Qazaqstanda arnaýly áleýmettik qyzmetter kórsetetin uıymdarǵa qoıylatyn sapa men qaýipsizdiktiń biryńǵaı talaptary belgilengen. Olar kórsetiletin qyzmetti usynatyndardyń barlyǵyna, olardyń ornalasqan óńirine, menshik nysanyna jáne qyzmet alýshylar sanatyna qaramastan qoldanylady.
Qazirgi tańda arnaýly áleýmettik qyzmetterdi 600-den astam lıtsenzııalanǵan uıym 100 myńnan asa azamatqa kórsetedi. Biryńǵaı tásildiń negizgi maqsaty — adamnyń turǵylyqty jerine nemese júgingen uıymyna qaramastan, kórsetiletin kómektiń sapasyn birdeı bazalyq deńgeıde qamtamasyz etý.
Memlekettik standarttarda turý jaǵdaılaryna, qaýipsizdikke, kadrlyq qamtylýyna, materıaldyq-tehnıkalyq bazasyna, sondaı-aq kórsetiletin qyzmetterdiń kólemi men sapasyna qoıylatyn talaptar aıqyndalǵan. ıAǵnı talaptar ǵımarattar men qural-jabdyqtardyń bolýymen ǵana shektelmeıdi. Negizgi nazar kórsetiletin kómektiń sapasyna, mamandardyń kásibıligine jáne qyzmet alýshynyń qaýipsizdigine aýdarylady.
— Júıeni damytýdyń mańyzdy kezeńderiniń biri — 2025 jylǵy 1 qańtardan bastap arnaýly áleýmettik qyzmetter kórsetetin uıymdardy mindetti lıtsenzııalaý tártibiniń engizilýi. Endi belgilengen talaptarǵa sáıkestik lıtsenzııa alý kezinde ǵana emes, memlekettik baqylaý barysynda da baǵalanady. Biryńǵaı talaptar memlekettik te, memlekettik emes te qyzmet kórsetýshilerge birdeı qoldanylady. Bul júıege qatysýshylar úshin teń jaǵdaı qalyptastyryp, azamattardyń kórsetiletin áleýmettik kómektiń sapasyna degen senimin arttyrady, — delingen mınıstrlik habarlamasynda.
Sonymen qatar arnaýly áleýmettik qyzmetter júıesin jetildirý jumystary jalǵasyp jatyr. Tsıfrlyq sheshimder engizilip, qarjylandyrý men mamandar daıarlaý tásilderi jetildiriledi, zamanaýı ınfraqurylym damyp keledi.
Vedomstvo atap ótkendeı, negizgi qaǵıdat ózgerissiz qalady: turǵylyqty jeri nemese uıymnyń menshik nysany áleýmettik kómektiń sapasyna áser etpeýi tıis. Arnaýly áleýmettik qyzmet alýshylardyń barlyǵy qaýipsiz, kásibı ári sapaly qoldaýǵa teń dárejede qol jetkizýi qajet.
Buǵan deıin elimizde 12 myń áleýmettik qyzmetker biliktiligin arttyrý kýrsynan ótkenin jazǵanbyz.
