Qazaqstanda áleýmettik-kásipkerlik korporatsııalar óńirlik damý ınstıtýttaryna aınalady
ASTANA. KAZINFORM – Qazaqstanda áleýmettik-kásipkerlik korporatsııalar óńirlik damý ınstıtýttaryna transformatsııalanýda.
Bul másele Premer-mınıstrdiń orynbasary Qanat Bozymbaevtyń tóraǵalyǵymen ótken keńeste qaraldy.
ÁKK-lerdi tolyqqandy óńirlik damý ınstıtýttaryna aınaldyrý Memleket basshysynyń tapsyrmasyn oryndaý aıasynda júzege asyrylyp jatyr.
ÁKK qyzmetin jetildirý jónindegi usynystardy salalyq mınıstrlikter, óńir ákimdikteri jáne korporatsııalardyń ózderi usyndy.
Ulttyq ekonomıka mınıstrligi ÁKK qyzmetiniń 7 negizgi fýnktsııasyn aıqyndady. Osy fýnktsııalar aıasynda ÁKK óńirlik jobalardyń bes jyldyq portfelderin qalyptastyryp, árbir joba boıynsha ınvestorlar men kredıtorlardy aıqyndaýy tıis. Qarjylandyrý kózderi retinde ekinshi deńgeıli bankter men «Báıterek» holdınginiń damý ınstıtýttary qarastyrylyp otyr.
Sonymen qatar ÁKK bıznes pen ulttyq damý ınstıtýttary arasyndaǵy baılanystyrýshy býyn retinde áreket etedi. Olardyń qatarynda «Damý» qory, ÓDQ, Qazaqstannyń Damý Banki, Agrarlyq kredıttik korporatsııa, KazakhInvest, QazIndustry jáne QazTrade bar. Sondaı-aq ÁKK-lerge tabystylyq jáne ózin-ózi aqtaý qaǵıdattary negizinde kredıt berý quqyǵyn berý josparlanyp otyr. Memlekettik aktıvterdi basqarý tabys tabýǵa baǵdarlanýy tıis.
Reforma aıasynda turaqtandyrý qorlaryn ÁKK qurylymynan shyǵarý máselesi qarastyrylýda. Bul tıimsiz fýnktsııalardy joıýǵa, ashyqtyqty arttyrýǵa jáne kredıttik reıtıngter alý men naryqtyq qarjylandyrý tartýǵa múmkindik beredi.
Keńes qorytyndysy boıynsha Qanat Bozymbaev arnaıy ekonomıkalyq jáne ındýstrııalyq aımaqtardyń jumys isteý máselelerin pysyqtaýdy, beıindi emes aktıvterge túgendeý júrgizýdi, sondaı-aq ÁKK úshin biryńǵaı kredıttik jáne ınvestıtsııalyq saıasatty qalyptastyrýǵa arnalǵan normatıvtik bazany ázirleýdi tapsyrdy.
Aıta keteıik, Oljas Bektenov temirjol vokzaldaryn jańǵyrtý jumystary baıaý júrip jatqanyn synady.
