Elimizde áleýmettik kásipkerler sany bir jylda eki esege jýyq ósti

ASTANA. KAZINFORM — Mınıstrlik 2025 jylǵy 31 jeltoqsandaǵy jaǵdaı boıynsha Áleýmettik kásipkerlik sýbektileriniń tizilimin bekitti. Oǵan 1431 áleýmettik kásipkerlik sýbektisi engizilgen. Al 2024 jylǵy qorytyndy boıynsha tizilimde 835 kásiporyn bolǵan, dep habarlaıdy UEM baspasóz qyzmeti.

Tizilimge sáıkes, áleýmettik kásipkerlerdiń kóbi Astana men Almaty qalasynda, sondaı-aq Batys Qazaqstan, Almaty jáne Abaı oblystarynda shoǵyrlanǵan.

— Qyzmet túrleri boıynsha áleýmettik kásipkerlerdiń shamamen 60%-y bilim berý, 20%-y áleýmettik qyzmet kórsetý, taǵy 10%-y densaýlyq saqtaý jáne t. b. salada jumys isteıdi. Tizilimdi qalyptastyrý jáne júrgizý oblystardyń, respýblıkalyq mańyzy bar qalalardyń jáne astananyń jergilikti atqarýshy organdary usynatyn málimetter negizinde júzege asyrylady. Ótinimderdi aldyn ala arnaıy komıssııa qaraıdy, — delingen habarlamada.

Komıssııanyń negizgi mindeti — Áleýmettik kásipkerlik salasyndaǵy qyzmetti júzege asyratyn dara kásipkerler men zańdy tulǵalardy (iri kásipkerlik sýbektilerin qospaǵanda) Tizilimge engizý boıynsha usynym ázirleý.

Qoldanystaǵy zańnamaǵa sáıkes, tizilimdi mınıstrlik jyl saıyn ótken kúntizbelik jylǵy 31 jeltoqsandaǵy jaǵdaı boıynsha aǵymdaǵy jylǵy 1 naýryzǵa deıin bekitedi.

Eske salsaq, Qazaqstanda áleýmettik kásipkerliktiń jumys isteýi úshin zańnamalyq negiz 2021 jyly qalyptasty. Sodan keıin normatıvtik deńgeıde «áleýmettik kásipkerlik» uǵymy, ıaǵnı azamattar men qoǵamnyń áleýmettik máselelerin sheshýge arnalǵan kásipkerlik qyzmet bekitildi.

Áleýmettik kásipkerlikke múgedektigi bar adamdar qurǵan kásiporyndar, sondaı-aq erekshe qajettiligi bar adamdar men halyqtyń áleýmettik osal toby ókilderi úshin jumys ornyn qamtamasyz etetin bıznes jatady.

Budan buryn Qazaqstanda 1,2 mln kásipker arnaıy rejımdi tańdaǵanyn jazǵan bolatynbyz.