Qazaqstanda áleýmettik azyq-túlik baǵasy ótken jyldyń deńgeıinde saqtalyp otyr
ASTANA. KAZINFORM — Elimizde azyq-túlik taýarlarynyń baǵasy ótken jyldyń deńgeıinde saqtalǵan. Bıyl 4 qańtardan bastap áleýmettik mańyzy bar azyq-túlik taýarlarynyń ýaqytsha keńeıtilgen tizbesi engizildi, dep habarlaıdy Saýda jáne ıntegratsııa mınıstrligi.
Buǵan deıin tizbe 19 ataýdan tursa, qazirgi ýaqytta ol 31 ataýǵa deıin keńeıtildi. Atalǵan taýarlardyń qataryna qııar, qyzanaq, alma, shaı, qaımaq, balyq, sıyr eti (súıekti jáne súıeksiz), taýyq eti, taýyq, jylqy eti jáne qatty irimshik kirdi.
Ulttyq statıstıka bıýrosynyń derekterine sáıkes, bıylǵy jyldyń birinshi aptasynyń qorytyndysy boıynsha áleýmettik mańyzy bar azyq-túlik taýarlary baǵasynyń ındeksi 0,2 paıyzdy qurady. Ótken jyldyń sáıkes kezeńinde de bul kórsetkish 0,2 paıyz deńgeıinde tirkelgen. Sonymen qatar, bıyl atalǵan kórsetkish keńeıtilgen taýarlar tizbesin eskere otyryp qalyptasqanyn atap ótken jón, bul birinshi kezektegi azyq-túlik ónimderi baǵasynyń turaqty ekenin kórsetedi.
Keńeıtilgen tizbege engizilgen birqatar jańa taýar pozıtsııalary boıynsha baǵanyń 0,1–0,5 paıyz aralyǵynda tómendegeni baıqalyp otyr. Bul tómendeý kólemi jaǵynan shamaly bolǵanymen, baǵany turaqtandyrý úderisiniń bastalǵanyn jáne qysqa merzim ishinde alǵashqy nátıjelerge qol jetkizilgenin kórsetedi. Atap aıtqanda, jemis-kókónis ónimderi boıynsha alma baǵasy 0,5 paıyzǵa, qııar men qyzanaq baǵasy 0,4 paıyzǵa arzandady. Bakaleıa ónimderi segmentinde qatty jáne jartylaı qatty irimshikterdiń baǵasy 0,3 paıyzǵa, qara shaı baǵasy 0,2 paıyzǵa tómendedi. Sondaı-aq et jáne balyq ónimderi toby boıynsha baǵa 0,1 paıyzǵa tómendedi, al sút ónimderi ishinde qaımaq baǵasynyń 0,1 paıyzǵa arzandaýy tirkeldi.
Baǵany tejeý maqsatynda jyl basynan beri saýda nysandarynda baǵaǵa turaqty monıtorıng jasalyp, bıznes ókilderine túsindirý jumystary júrgizilip jatyr. Osy oraıda 13 qańtarda QR Saýda jáne ıntegratsııa mınıstrliginiń Saýda komıteti tóraǵasynyń orynbasary Daýlen Kabdýshev jergilikti atqarýshy organdardyń ókilderimen birlesip elordadaǵy bazarlarda baǵa monıtorıngin ótkizip, satýshylarǵa túsindirý jumystaryn ótkizdi.
— Osyndaı jumystardy óńirlerdegi áriptesterimiz de turaqty júrgizip jatyr. Qazir satýshylarǵa buryn ÁMAT tizbesinde bolmaǵan taýarlardyń endi tizimge qosylǵanyn túsindirip jatyrmyz. Bul degenińiz Saýda komıteti tarapynan jańadan tizimge qosylǵan taýarlardyń saýda ústemesine memlekettik baqylaý júrgiziledi degen sóz. Aıta ketý kerek, qoldanystaǵy zańnamaǵa sáıkes áleýmettik taýarlarǵa qoıylatyn maksımal saýda ústemesi 15 paıyzdan aspaýy kerek, — dedi Daýlen Kabdýshev.
Osydan buryn Qazaqstanda azyq-túlik salasyn qoldaý boıynsha jumys toby qurylǵany belgili boldy.