Qazaqstanda áleýmettik saladaǵy volonterlerge suranys joǵary - Azamat Jumaǵazy
15 jasynan bastap volonter
- Men qazir 25 jastamyn. Volonterlikpen 10 jyldan beri aınalysamyn. 2009 jyly volonter retinde alǵashqy qadam jasadym. Basynda merekeler qarsańynda dostarymyzben birge túrli fleshmob uıymdastyryp bastadyq. Eń birinshi volonter retinde 2009 jyly 9 mamyr Jeńis kúnine oraı shara uıymdastyrdyq. Keıin 2009-2010 jyldary arasynda «EKO Mańǵystaý» Úkimettik emes uıymy qataryna shaqyrdy. Bul uıymnyń maqsaty tabıǵatty qorǵaý bolatyn. Men pandanyń kıimin kıip, eko volonterlikpen aınalystym. 2011 jyly «Arman» jastar ortalyǵy «Esirtkige jol joq!» aktsııasyna shaqyrdy. Onda «Jas talap» jastar klýby quryldy. Men olardyń qataryna kirdim. Basynda tek 10 shaqty adam boldyq. Bizder qaladaǵy qaıyrymdylyq sharalaryna qatysa bastadyq. Ásirese, salaýatty ómir saltyn qalyptastyrý baǵytyndaǵy is-sharalarǵa at salystyq. Keıin osy klýbtyń kóshbasshysy etip saılady. Osylaısha, klýbtyń ósip-órkendeýi úshin jumys istedim. Men basqarǵan klýbtyń ǵumyry 2 jylǵa jalǵasty. Ol ýaqytta bizdiń qatarymyz 80-ge jýyq talantty jastarmen tolyqty. Árıne, zymyraǵan zamanda qatarymyz sıreı bastady. Óıtkeni, klýb músheleriniń qyzyǵýshylyǵy ózgerdi. Biri basqa qalalarǵa oqýǵa ketti. Kópshiligi basqa salany tańdady. Osylaısha, az ýaqyttyń ishinde volonterler qalmady. Al, men «Eko Mańǵystaý» quramynda qalyp, eko volonterlikti qolǵa aldym. Mańǵystaýda kıeli jerler óte kóp. Sol jerlerde ár demalys saıyn senbilik uıymdastyratynbyz. Jastarmen birge túrli aǵash otyrǵyzyp, óńirdiń bıo alýandyǵyn saqtap qalý maqsatynda biraz eńbek ettik.
Volonterlik - qoǵamǵa paıdańdy tıgizý, úlkenderge járdemdesý, elińniń patrıoty bolý
- Shynymdy aıtsam, kishkentaıymnan kópshilik ortada júrgen unaıtyn. Sodan bolar qolym qalt etse, qasymdaǵy balalarmen qandaı da bir shara uıymdastyrǵymyz kelip turatyn. Óse kele bul qyzyǵýshylyǵym arta tústi. Men basynda muny volonterlik ekenin bilmedim. Biraq, óse kele qoǵamǵa paıdamdy tıgizý, úlkenderge járdemdesý, elińniń patrıoty bolý volonterlik ekenin túsindim.
Koronavırýs pandemııasy kezinde eriktiler qyzmetine suranys artty
- Pandemııa kezinde eriktiler qyzmetine suranys artqanyn eshkim joqqa shyǵarmas. Alǵashqy karantın kezinde tek arnaıy ruqsat qaǵazy bar volonterlerdiń emin-erkin júrýine ruqsat etildi. Al, qandaı da bir toptyń múshesi emes jastarǵa qıyn bolǵany ras. Al, jaz mezgilinde aýrýhanalarǵa ottegi ballondaryn jetkizý kezinde qosymsha kómektiń qajet bolǵany ras. Sol ýaqytta men óz erkimmen baryp, jastardyń qataryna qosyldym. Ol jerde bastama kóterip, aq halattylarǵa kómek kórsetý jaıyn aıtqan ózge jastar boldy. Al, men olarǵa qoldaý kórsettim.
Qazaqstanda áleýmettik saladaǵy volonterlerge suranys joǵary
- Bizdiń elimizde áleýmettik saladaǵy volonterlerge suranys joǵary. Máselen, qarttar men jetimderge kómek kórsetetin jastar jetpeı jatady. Sonyń ishinde túrli aýrýǵa shaldyqqan balalarǵa kómektesetin jastarǵa suranys joǵary. Jalpy bıyl «Volonterler jyly» dep atalýy eriktilerdiń mártebesin kóterdi. Menińshe, eriktiler memlekettiń qoldaýy mańyzdy ekenin túsingen sııaqty. Demek, kúsh birikkende ǵana nátıje shyǵarýǵa bolatynyn eki jaq ta túsindi degen senimdemin. Onyń ústine osy álemdik pandemııa kezinde elimizdiń ár qalasyndaǵy eriktiler bir-birimen baılanysqa shyǵyp, qarym-qatynasty nyǵaıtty dep aıta alamyn. Máselen, jazda qaýipti vırýs kúsh alǵan ýaqytta ár aımaqtaǵy eriktiler dári-dármek jetpegen óńirlerge qajetti preparattardy jetkizip, qol ushyn sozdy.
Volonterliktiń baǵyty kóp
- Ózimdi tájirıbeli volonterlerdiń qataryna jatqyzamyn. Qansha degenmen 10 jylǵa jýyq tájirıbem bar. Jalpy elimizde volonterlik qyzmet jaı, biraq qajetti baǵytta damyp jatyr der edim. Jyl saıyn bul qyzmet jaqsaryp keledi. Ásirese, jańadan qurylyp jatqan volonterler klýby, eriktiler qozǵalysynyń sany artdai. Bul jaqsy árıne. Sebebi eriktilerdiń qatary kóbeıgen saıyn kómekke muqtaj jandarǵa beriletin kómek kólemi artady. Menińshe, jastar volonterlikti qarttarǵa, kópbalaly, turmysy tómen otbasylarǵa kómektesýmen shekteledi dep oılamaýy kerek. Volonterliktiń baǵyty kóp. Sondyqtan eko volonterlikti, janýarlarǵa qamqorlyqty da umytpaýymyz qajet.
