Qazaqstanda áleýmettik nysandardyń 96 paıyzy múgedekterge beıimdelgen

NUR-SULTAN. QazAqparat - Qazaqstandaǵy áleýmettik jáne kólik ınfraqurylymynyń 34,3 myń nysanynyń 96,6 paıyzyy múgedektigi bar adamdar úshin qoljetimdi orta qurý maqsatynda beıimdeldi. Bul jaıynda QR Eńbek jáne halyqty áleýmettik qorǵaý mınıstrliginiń baspasóz qyzmetinen málim etti, dep habarlaıdy QazAqparat.

«2020 jylǵy 1 qańtardaǵy jaǵdaı boıynsha 34 301 nysannyń (mektepter, aýrýhanalar, kitaphanalar, mádenıet úıleri, temirjol jáne avtovokzaldar, áýejaılar jáne t.b.) jalpy sanynan jergilikti atqarýshy organdar 33 642 nysanǵa pasporttaý júrgizdi. Múmkindikteri shekteýli adamdar úshin qoljetimdi orta jaǵdaılarynyń saqtalýyn, ıaǵnı pandýstardy, dybystyq/vızýaldy/akýstıkalyq/sezgish qurylǵylardy, aqparattyq belgilerdi ornatýdy, turaq úshin oryndar bólýdi jáne taǵy basqalarymen qamtamasyz etý úshin pasporttaý júrgizildi. Mundaǵy maqsat árbir qazaqstandyq óziniń densaýlyǵyna qaramastan, osy nysandarǵa kire alýy kerek», - dep atap ótedi Eńbek mınıstrliginen.

Vedomstvo málimetinshe, pasporttalǵan 24 452 nysan múgedekterge beıimdelýi qajet. Qazirgi ýaqytta 23 314 nysan beıimdeldi. Osylaısha, pasporttalǵan nysannyń jalpy sanynyń 96,6 paıyzy múgedekterge beıimdelip otyr.

«Nysandardy 100 paıyz beıimdeý Almaty qalasynda, Shyǵys Qazaqstan, Soltústik Qazaqstan, Qaraǵandy oblystarynda júzege asyryldy. Batys Qazaqstan oblysynda – 99,4, Atyraý oblysynda – 98,6, Aqtóbe oblysynda – 98,5, Qyzylorda oblysynda – 98,1, Mańǵystaý oblysynda – 97,3, Shymkent qalasynda – 96,1, Pavlodar oblysynda – 96, Nur-Sultan qalasynda - 95,4, Túrkistan jáne Qostanaı oblystarynda – 95, Jambyl oblysynda – 94, Almaty oblysynda – 92,2, Aqmola oblysynda – 83,3 paıyz beıimdelgen», - dedi mınıstrlikten.