Qazaqstanda Áleýmettik medıtsınalyq saqtandyrý qoryna baǵyttalǵan jarnalar boıynsha jyl saıyn esep jarııalanady
Bul týraly búgin 29 qazanda QR Parlamenti qabyldaǵan «Mindetti áleýmettik medıtsınalyq saqtandyrý týraly» QR Zańynyń normalaryn túsindirýge arnalǵan baspasóz máslıhatynda QR Densaýlyq saqtaý jáne áleýmettik damý vıtse-mınıstri Alekseı Tsoı habarlady.
«Barlyq aktıvterdi QR Ulttyq banki qadaǵalaıdy, sáıkesinshe, bizdiń quzyrly organdar da tolyqtaı monıtorıngti júrgizedi. Atap aıtqanda, qorda jınalatyn qarjynyń medıtsınalyq qyzmetterge baǵyttalýy óte mańyzdy dep bilemiz, ıaǵnı bul maqsatty aqshalar emdelgen árbir azamatqa tikeleı baǵyttalady»,-dedi mınıstrdiń orynbasary.
Ol osy baǵyttaǵy is-qımyldardyń barlyǵy ashyq bolatynyn aıta kele: «Jyl saıyn buqaralyq esep jasaý josparlanýda. Saqtandyrý jarnasyn tólegen árbir azamat jelidegi «jeke kabınetinen» tólemderdiń barlyǵyn ashyq kóre alady. Bul turǵydaǵy sharalar jarııa bolady»,-dedi A. Tsoı.
Budan buryn habarlanǵandaı, qyzmetkerler jarnasynyń mólsherlemesi kiristiń 2%-yn quraıtyn bolady, aýdarym 2019 jyly 1%, 2020 jyldan bastap 2% bolady. Bul jarnalar somasy jeke tabys salyǵyn esepteý kezinde shegeriletin bolady.
Ózin-ózi jumyspen qamtyǵan azamattar jarnasynyń mólsherlemesi (jeke kásipkerler, jeke notarıýstar, jeke sot oryndaýshylary, advokattar, kásibı medıatorlar, azamattyq-quqyqtyq negizdegi kelisim boıynsha kiris tabatyn jeke tulǵalar) olardyń kirisiniń 7% quraıtyn bolady. Ol 2017 jyly 2%, 2018 jyly 3%, 2019 jyly 5%, 2020 jyldan bastap 7% bolady.
«Atalǵan jarnalar jumys berýshiler úshin korporatıvti tabys salyǵyn esepteý kezindegi, qyzmetkerler men ózin-ózi jumyspen qamtyǵan azamattar úshin jeke tabys salyǵyn esepteý ýaqytyndaǵy shegerimge jatqyzylatynyn atap ótkim keledi. ıAǵnı, 2017 jyly jumys berýshilerge túsetin is júzindegi salmaq 1,6%, 2018 jyly - 2,4%, 2019 jyly - 3,2%, 2020 jyly - 4% quraıtyn bolady», - dep túsindirdi Alekseı Tsoı.
Aıta keteıik, Mindetti aı saıynǵy jarnalar men QR DSÁDM Medıtsınalyq qyzmetterdi tóleý komıtetiniń bazasynda medıtsınalyq qyzmetterdi satyp alýdy toptastyrý úshin kommertsııalyq emes aktsıonerlik qoǵamnyń uıymdastyrýshylyq-quqyqtyq formasynda Áleýmettik medıtsınalyq saqtandyrý qory qurylatyn bolady. Qordyń quryltaıy ári jalǵyz aktsıoneri QR Úkimeti bolmaq.