Qazaqstanda áleýmettik máseleler birliktiń, turaqtylyqtyń arqasynda ońynan sheshilýde - N.Nazarbaev
ASTANA. Qazannyń 19-y. QazAqparat - Qazaqstanda áleýmettik máseleler birliktiń, turaqtylyqtyń arqasynda ońynan sheshilýde. Bul týraly aımaq ákimderimen bolǵan búgingi jumys keńesinde Elbasy N.Nazarbaev málim etti.
Prezıdenttiń tapsyrmasy boıynsha sondaı-aq úlestik salymshylardyń problemalary, basqa da áleýmettik máseleler sheshimderin tabýda: jyldyń basynan beri zeınetaqylar, stıpendııalar, bıýdjet salasy qyzmetkerleriniń jalaqylary kóterildi. Oǵan qosa, bıyl 37 mektep salyndy, 10 iri medıtsınalyq mekeme ashyldy. Bir jylǵa jeter-jetpes ýaqyttyń ishinde 457 jańa balabaqsha men mektep jasyna deıingi balalardy daıyndaıtyn shaǵyn ortalyqtar ashyldy.
«Osynyń barlyǵy halyq úshin, qarapaıym azamattar úshin jasalyp jatyr jáne birliktiń, turaqtylyqtyń arqasynda múmkin bolyp otyr», -dep atap kórsetti Nursultan Nazarbaev óz sózinde.
