Qazaqstanda áleýmettik kásipkerlik sýbektileriniń tizilimi qurylady
«Qazaqstan Respýblıkasynyń keıbir zańnamalyq aktilerine áleýmettik kásipkerlikti damytý máseleleri boıynsha ózgerister men tolyqtyrýlar engizý týraly» Zań jobasy birinshi oqylymda maquldandy.
Májilis depýtaty Ekaterına Smyshlıaevanyń aıtýynsha, zań jobasynda alǵash ret qyzmeti qoǵamnyń áleýmettik máselelerin sheshýge baǵyttalǵan kásipkerlik sýbektilerine anyqtama berilgen.
«Zań jobasyna sáıkes, kásipker mártebesin alý úshin tómendegi sharttardyń kem degende bireýin oryndaýy kerek:
- azamattardyń áleýmettik osal sanattary úshin qyzmetkerlerdiń jalpy sanynyń keminde 50%-yn quraıtyn sapaly jumys oryndaryn qurý;
-halyqtyń áleýmettik osal toptaryna arnalǵan taýarlardy óndirý, olardy ótkizýden túsetin tabys kásiporynnyń jalpy tabysynyń keminde 50%-yn quraýy tıis;
- áleýmettik qyzmet kórsetý, densaýlyq saqtaý, bilim berý jáne tárbıe, mádenıet jáne sport salalarynda qyzmet kórsetý», - dedi Májilistiń jalpy otyrysynda Ekaterına Smyshlıaeva.
Zań jobasynda halyqtyń áleýmettik osal toptarynyń salalyq tizbesi aıqyndalǵan, oǵan barlyq toptaǵy múgedekter, kóp balaly jáne tolyq emes otbasylardan shyqqan jumysqa qabiletti azamattar, múgedek balany tárbıelep otyrǵan ata-analar, bas bostandyǵynan aıyrý oryndarynan bosatylǵan, hımııalyq táýeldilikterden emdelgen azamattar, zeınet jáne zeınet aldyndaǵy jastaǵy adamdar jáne basqalar kiredi.
«Zań jobasynda kásipkerlik sýbektisiniń jáne osyndaı uıymdarmen ózara is-qımyl jónindegi ýákiletti organdardyń mártebesin aıqyndaý tártibi qarastyrylǵan. Osylaısha, áleýmettik kásipkerlik sýbektileriniń tizilimin qurý kózdelip otyr, tizilimge ený zańdylyǵyn óńirlik komıssııa aıqyndaıdy, al Ulttyq ekonomıka mınıstrligi tizilimge ákimshilik etedi», - deıdi depýtat.
Zań jobasynda áleýmettik kásipkerlikti memlekettik qoldaýdyń naqty sharalary qarastyrylǵan. Ony júzege asyrý boıynsha quzyretter jergilikti atqarýshy organdarǵa jáne memlekettik damý ınstıtýttaryna beriledi.
«Memlekettik qoldaý sharalary ınfraqurylymdy qamtamasyz etýdi, granttyq qarjylandyrýdy, kredıtter boıynsha mólsherlemelerdi sýbsıdııalaýdy, múliktik qoldaýdy, salyqtyq jeńildikterdi, oqytýdy, aqparattyq súıemeldeýdi, iskerlik áriptesterdi izdeýge járdemdesýdi jáne akseleratsııalyq baǵdarlamalar arqyly damytýdy kózdeıdi», - dep túıindedi depýtat.
