Qazaqstanda áleýmettik kásipkerler tizimi qurylady

NUR-SULTAN. QazAqparat – Qazaqstanda áleýmettik kásipkerler tizimi men kartasy qurylady, dep habarlaıdy QazAqparat.

Bul bastama Memleket basshysy Qasym-Jomart Toqaevtyń «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty Qazaqstan halqyna Joldaýyndaǵy tapsyrmamen úndes.

Atalǵan tizim Qazaqstandaǵy áleýmettik kásipkerliktiń damý deńgeıin baǵalaýǵa, eldegi áleýmettik kásipkerlikti damytý kartasyn ázirleýge, úkimettik emes sektor men kásipkerliktiń qyzmetin jandandyrýǵa jáne respýblıka boıynsha derekterdi júıeleýge múmkindik beredi.

Tizimdi QR Aqparat jáne qoǵamdyq damý mınıstrligi «Azamattyq bastamalardy qoldaý ortalyǵy» KEAQ jáne «Act for Impact» (Impact Hub Almaty) korporatıvtik qory birlesip ázirleıdi.

«Qazirgi ýaqytta áleýmettik kásipkerlerdi tirkeý boıynsha belsendi jumys júrip jatyr. Áleýmettik kásipkerlerdiń ádettegi ÚEU-dan nemese bıznesten aıyrmashylyǵy – áleýmettik kásipkerliktiń negizinde áleýmettik mıssııa jatyr. Áleýmettik kásipkerler tizimine ený úshin https://forms.gle/kKozBAoHEjUG349H6 arnaıy paraqshasy arqyly saýalnamadan ótip, silteme boıynsha tirkelý qajet», - delingen uıymdastyrýshylardyń habarlamasynda.

Búgingi tańda beıresmı esep boıynsha Qazaqstanda shamamen 200 áleýmettik kásiporyn jumys isteıdi. «Ozgeris Ustasy» syılyǵyna kelip túsken ótinim nátıjesine sáıkes, uıymdardyń 60%-ǵa jýyǵy múmkindigi shekteýli adamdardy jumysqa ornalastyrý jáne áleýmettik beıimdeý, jalpy áleýmettik osal toptardy qoldaý máselelerin sheshedi. Sondaı-aq, bilim sapasy men qoljetimdiligi (16,3%) jáne ekologııa (9,3%) máseleleri de ózekti bolyp otyr.

Aıta keteıik, Qazaqstanda áleýmettik kásipkerlikti damytýǵa úles qosqandar arasynda «Ózgeris ustasy» І respýblıkalyq baıqaýy ótedi. Bul marapat áleýmettik kásipkerlikpen aınalysatyn úkimettik emes uıymdarǵa jáne Qazaqstandaǵy áleýmettik kásipkerliktiń damýyna yqpal etken halyqaralyq uıymdar, korporatıvtik bıznes, BAQ nemese memlekettik ınstıtýttarǵa beriledi.

Baıqaýǵa ótinim berý aıaqtalyp, qoǵamdyq daýys berýge 22 qatysýshy iriktelip shyqty. Nomınanttarǵa daýys berý 2019 jylǵy 14-30 qazan aralyǵynda voting.ozgeris-ustasy.kz saıtynda júrgizilgen.

Daýys berý qorytyndysy boıynsha 15 úzdik áleýmettik kásipker anyqtalady. Olar 6 nomınatsııa boıynsha iriktelip, 500 000 teńge kóleminde grantqa ıe bolady. Marapattaý rásimi 2019 jyldyń 15 qarashasynda Almaty qalasynda ótedi.