Qazaqstanda áleýmettik aýdarymdardy esepteý erejesi ózgerdi
ASTANA. QazAqparat - Qazaqstanda 2017 jylǵy 5 qazannan bastap áleýmettik aýdarymdardy esepteý jáne aýdarý erejesine engizilgen ózgerister kúshine endi, dep habarlaıdy «QazAqparat» HAA Qazaqstan Respýblıkasy Eńbek jáne halyqty áleýmettik qorǵaý mınıstrligine silteme jasap.
Qazaqstanda jumys berýshiler men kásipkerlerdiń ótinishterine baılanysty «Áleýmettik aýdarymdardy esepteý jáne aýdarý erejesin bekitý týraly» Qazaqstan Respýblıkasy Úkimetiniń 2004 jylǵy 21 maýsymdaǵy № 683 qaýlysyna ózgerister engizildi. Tıisti túzetýler «Qazaqstan Respýblıkasy Úkimetiniń keıbir sheshimderine ózgerister men tolyqtyrýlar engizý týraly» Qazaqstan Respýblıkasy Úkimetiniń 2017 jylǵy 29 qyrkúıektegi № 603 qaýlysymen bekitilip, ústimizdegi jyldyń 5 qazanynan bastap kúshine endi.
Qoldanystaǵy zańdylyqqa engizilgen túzetýlerge sáıkes, Qazaqstanda áleýmettik aýdarymdardyń tıyndarda eseptelgen mólsheri 1 teńgege deıin dóńgelektenedi. Sonymen qatar áleýmettik aýdarymdardy esepteý úshin aı saıynǵy tabys respýblıkalyq bıýdjet týraly zańda belgilengen eń tómengi jalaqydan tómen emes jáne 10 eselengen eń tómengi jalaqydan joǵary emes mólsherde qoldanylady.
Mindetti áleýmettik saqtandyrý júıesine qatysýshylar úshin tólenetin ÁA-lardy esepteý jáne aýdarý aı saıyn júrgiziledi.
