Qazaqstanda álemge áıgili ıllıýzıonıster shoýy ótedi
ASTANA. QazAqparat - Álemge áıgili «The Illusionist» Brodveıdegi, londondyq Vest-Endtegi jáne Azııadaǵy týrlaryn aıaqtap, Qazaqstanǵa arnaıy qoıylymmen keldi, dep habarlaıdy QazAqparat tilshisi.
«Illıýzıonıster» shoýy 25 memlekettegi 200 qalany sharlap, Brodveı tarıhyndaǵy eń úzdik bolyp tanylǵan ujym. AQSh, Avstralııa, Kanada jáne Ulybrıtanııadaǵy tańqalarlyq jetistiginen keıin olar Eýropany "jaýlaýyn" jalǵastyrýda. Endi mine, Astana men Almaty turǵyndaryna da osyndaı joǵary deńgeıdegi sıqyr ónerin kórý múmkindigi týyp otyr.
«Illıýzıonıster» shoýynyń qoıylymdarynan kórermender ıllıýzııany arbaıtyn kórinisterdi, aýada qalyqtaýdy, oıdy oqýdy, joǵalýdy jáne basqa da kóptegen joǵary tehnologııaly jáne qaýipti trıýkterdi kóre alady. Ázirge olardy prodıýsserler qatań qupııada ustap otyr. Budan bólek klassıkalyq ıllıýzııaǵa zamanaýı estetıka, ádemi kostıýmder jáne teatr óneri qosylady.
Qazaqstanda qoıylatyn shoýdyń quramynda 7 ıllıýzıonıst bar. Atap aıtqanda, Harrıson Grınbaým falsıfıkator, Mark Kalın shoýmen, Djınjer Laıt sıqyrshy, Enzo sıqyrshy, Krendl júgirý sheberi, Sebastıan Nıkolas manıpýlıator, Robın Sharp qarý sheberi.
Atalǵan sıqyrshylardyń shoýy dúnıejúzindegi mıllıondaǵan kórermenderi bar FOX, Masters of Illusion arnalaryndaǵy, NBC, «Magic on the Edge» telearnalaryndaǵy «Worlds Greatest Magic», «America's Got Talent» sekildi shoýlarda kórsetilgen.
«Bizdiń árqaısysymyz Qazaqstanǵa kelgenimizge asa qýanyshtymyz. 2018 jyl bizdiń shoý úshin erekshe jyl bolýda. Qazaqstanǵa alǵash kelýimiz bolǵandyqtan biz úshin barlyǵy tań jáne erekshe bolyp kórinýde. Biz álemniń kóptegen elderin araladyq degenmen Qazaqstan basqasha. Árıne áli tolyq aralap, tanysyp úlgermedik, degenmen shoý arasynda mindetti túrde jaqynyraq tanyp bilýge tyrysamyz. Sonymen qatar Qazaqstanǵa kelýimizdiń bul basy ǵana dep oılaımyn. Bizde bolashaqqa jospar kóp. Álemniń ár eline, ár qalasyna barǵan saıyn bizde jańa ıdeıa, jańa týyndylar paıda bolady. Bul joly da solaı bolady dep oılaımyz. Qoıylymdarǵa kelsek onyń qupııasyn ashpaı-aq qoıaıyq, biraq áserli shoý qoıýǵa ýáde beremiz», -dedi «Illıýzıonıster» shoýynyń kreatıvti prodıýseri Saımon Peınter shoýdyń ótkizilýine oraı uıymdastyrylǵan baspasóz máslıhatynda.
Baspasóz máslıhaty bitken soń ıllıýzıonıster qoıylymdarynan úzindi kórsetti.
«Illıýzıonıster» shoýy Astana qalasynda 6-7 qazan kúnderi Kongress ortalyqta jáne Almaty qalasynda 10-11 qazan kúnderi Respýblıka saraıynda bolady.
