Qazaqstanda álemdik deńgeıdegi mansapqa qalaı jetýge bolady

Agenttigimizge bergen suhbatynda ol mehanıkalyq jabdyqtardy jobalaý ınjenerinen bastap operatsııalyq keńesshige deıingi kásibı joly týraly áńgimeledi.

— Qazaqstan jas mamandarǵa mansaptyq ósýine, úlken jaýapkershilik alýyna jáne halyqaralyq deńgeıdegi jobalarmen jumys isteý úshin jetkilikti múmkindikter usynyp jatyr ma?

- Óz tájirıbeme súıene otyryp, Qazaqstan jas mamandardyń ósýine, úlken jaýapkershilik júkteletin mindetterdi atqarýǵa jáne halyqaralyq deńgeıdegi jobalarǵa qatysýǵa múmkindik beredi dep senimmen aıta alamyn. Meniń jeke mansabym – sonyń aıqyn dáleli. Óz mansabymdy mehanıkalyq jabdyqtardy jobalaý ınjeneri retinde bastap, negizinen tehnıkalyq jobalaý men ınjenerlik sheshimderge den qoıdym. Ýaqyt óte kele maǵan áldeqaıda aýqymdy salalarda jumys isteýge múmkindik berildi. Tehnıkalyq qyzmet kórsetýde tájirıbe jınaqtadym jáne bıznes tıimdiligi salasynda jumys istedim. Onda operatsııalyq sheshimder men bıznes nátıjeleri arasyndaǵy ózara baılanysty túsindim. Kúrdeli protsesterdi úılestirý baǵytyn meńgerdim.

Qazirgi ýaqytta operatsııalar boıynsha keńesshi bolyp jumys istep kelemin. Bul rette operatsııalarǵa, senimdilikke, tehnologııadyq protsesterdiń qaýipsizdigine jáne bıznes josparlaýǵa qatysty strategııalyq bastamalarǵa qoldaý kórsetemin.

Bolashaq kóshbasshylardy daıarlaýǵa shynaıy mán beretin kompanııada jumys isteý - úlken jetistik. Mansap jolymda kóshbasshylyq áleýeti bar qyzmetker retinde tanyldym jáne árbir jańa taǵaıyndaý maǵan túrli quzyretterdi jetildirýge kómektesti.

Bul protsestiń sanaly túrde júrgizilýi óte mańyzdy. Kompanııa maǵan jańa laýazymdar usynyp qana qoımaı, jańa tájirıbeni meńgerýge jaǵdaı jasady. Árbir laýazym bızneske jańa qyrynan qaraýǵa jol ashty. Bul turǵyda aktıvterdiń qalaı jobalanatynyn, tehnıkalyq qyzmet kórsetý men paıdalaný qalaı iske asatynyn, kúrdeli jóndeýlerdiń qalaı júrgiziletinin, tıimdilik qalaı baǵalanatynyn jáne strategııalyq sheshimderdiń qalaı qabyldanatynyn túsindim. Tájirıbe jınaqtaýdyń bul úılesimdi joly men úshin óte mańyzdy. Mundaı quzyretterdi tek oqýlyqtan úırený múmkin emes.

Sondyqtan Qazaqstanda izdenimmpaz mamandar úshin erekshe múmkindikter jasalǵanyna kámil senimin. TCO, NCOC jáne KPO sııaqty kompanııalar jahandyq mańyzy bar aktıvterdi basqarady jáne jergilikti mamandardyń áleýetin arttyrýǵa, olarǵa basshylyq qyzmetterdi atqarýǵa múmkindik berýge basa nazar aýdarady.

Qazaqstandaǵy jas mamandar mıllıardtaǵan dollarlyq jobalarǵa qatysýǵa, halyqaralyq sarapshylarmen birlese jumys isteýge jáne álemdik joǵary standarttarǵa saı keletin mansap qurýǵa múmkindik alady. Sondyqtan Qazaqstandy jaı ǵana jumys ornym emes, álemdik deńgeıdegi mansabymdy qalyptastyrǵan meken dep jıi aıtamyn.

Búginde Qazaqstannyń eń úlken artyqshylyǵyna toqtalsaq, bul salanyń damýy jalǵasyp keledi. Munda tek qolda bar aktıvterdi paıdalaný ǵana emes, sonymen qatar jańǵyrtý, tsıfrlandyrý, senimdilikti arttyrý, dekarbonızatsııa jáne jańa býyn mamandaryn daıarlaý arqyly salanyń bolashaǵyn qalyptastyrý múmkindikteri de bar. Jas mamandar salanyń damýyna eleýli úles qosa alady.

- Shetelde mansap qurýdy oılastyryp júrgen jastarǵa ne aıtar edińiz? Olardy elde qandaı múmkindikter kútip tur? Qazaqstannan ketpeı-aq, halyqaralyq deńgeıdegi mansapqa qol jetkizýge bola ma?

- Qazaqstan kóptegen jas maman tıisti deńgeıde baǵalaı almaı júrgen múmkindikti usynatynyn aıtar edim. Ol – qarqyndy ózgeristerge toly elmen jáne salamen birge damý múmkindigi.

Tabysty mansap týraly sóz etkende, kóbinese kásibı damý jolyna emes, geografııalyq ornalasýǵa basa nazar aýdaramyz. Meniń baıqaýymsha, eń qyzyqty múmkindikter kóbinese ózgerister oryn alyp jatqan, salalar jańǵyrtylyp, jańa býyn kóshbasshylaryna bolashaqty qalyptastyrýǵa múmkindik týatyn jerlerde paıda bolady. Búginde Qazaqstan – dál sondaı memleket.

Qazaqstanda jumys istep jatqan halyqaralyq kompanııalar jahandyq standarttardy jergilikti deńgeıde qoldanyp keledi. Sonymen qatar olar jergilikti mamandarǵa kúrdeli bastamalardy basqarýdy, strategııalyq mindetterdi sheshýdi jáne bıznestiń damýyn qalyptastyrýdy senip tapsyrýda. Bul jas mamandarǵa álemniń kez kelgen jerinde suranysqa ıe quzyretterdi damytýǵa jáne tájirıbe jınaýǵa múmkindik beredi.

Jas qazaqstandyqtarǵa jahandyq deńgeıde oılanýǵa jáne óz múmkindikterin geografııalyq shekaralarmen shektemeýge keńes berer edim. Álemniń úzdik tájirıbesin úırenińizder. Bilim alyp, halyqaralyq jobalarǵa qatysyp, ártúrli tásilderdi meńgerý arqyly tájirıbe jınaqtańyzdar. Ártúrli mádenıet ókilderimen baılanys ornatyńyzdar. Sonymen qatar, elimizde qoljetimdi artyqshylyqtardy da baǵalaı bilińizder.

Biz Qazaqstanda júzege asyrylyp jatqan álemdik deńgeıdegi jobalarǵa, ozyq tehnologııalarǵa, halyqaralyq komandalar men tájirıbege qol jetkize alamyz. Óz elimizden shyqpaı-aq halyqaralyq tájirıbe jınaqtaı alamyz.

Qazaqstannyń basty básekelestik artyqshylyǵy – onyń halqy. Jyl saıyn ózine senimdi, bilikti, tsıfrlyq tehnologııalardy jetik meńgergen jáne el damýyna úles qosýǵa umtylǵan jas mamandardyń kóbeıip kele jatqanyn kóremin. Olar jergilikti erekshelikterdi tereń túsine otyryp, jańashyl ıdeıalar men jahandyq kózqarasty alyp keledi. Mundaı úılesim zor áleýetke ıe.

Eń qundy tusy – sizdiń kásibı tabysyńyzdyń tek ózińizge ǵana emes, basqalarǵa da paıdasyn tıgizetindiginde shyǵar. Daryndy mamandar ózin jetildirip, tájirıbesin osynda qoldanǵan kezde, olar uıymdardy nyǵaıtýǵa, bolashaq kóshbasshylardy qalyptastyrýǵa jáne Qazaqstannyń uzaq merzimdi damýyna úles qosady. Kásibı jetistikterińizdiń óz elińizdiń damýymen tyǵyz baılanysty ekenin túsiný - óte mańyzdy.

Osy tusta aıtarym, Qazaqstanǵa jaı ǵana bir ótpeli kezeń retinde qaramańyz. Bizdiń elge álemmen baılanystyratyn, álemdik deńgeıdegi mindetterdi sheshýge jáne halyqaralyq standarttarǵa saı mansap qurýǵa múmkindik beretin negizgi alań retinde qarańyz. Elimizde osyndaı múmkindikter jeterlik.

– Suhbatyńyz úshin rahmet!