Qazaqstanda álemdik deńgeıdegi barlyq ota jasalady – Bolatbek Baımahanov
ASTANA. KAZINFORM – Qazaqstanda sońǵy 10 jylda 3,5 myńǵa jýyq aǵza transplantatsııasy jasaldy. Onyń ishinde balalarǵa jasalǵan kúrdeli otalar da bar. Bul týraly Aqordada marapattalǵan belgili hırýrg, A.N. Syzǵanov atyndaǵy Ulttyq ǵylymı hırýrgııa ortalyǵynyń basqarma tóraǵasy Bolatbek Baımahanov málimdedi.
Byltyr sáýir aıynda A.N. Syzǵanov atyndaǵy Ulttyq ǵylymı hırýrgııa ortalyǵy elimizdiń medıtsına tarıhynda tuńǵysh ret bir mezette úsh naýqasqa úsh donordyń búıregin toǵyspaly transplantatsııa tásilimen salatyn asa kúrdeli operatsııany sátti ótkizgen edi.
Prezıdent Qasym-Jomart Toqaev belgili hırýrg, professor Bolatbek Baımahanovtyń jetekshiligimen jasalǵan bul operatsııany otandyq medıtsınanyń zor jetistigi retinde baǵalap, ortalyq ujymyna Alǵys hat joldady.
– Memleket basshysynyń qolynan alǵan joǵary marapatty tek qana meniń eńbegime emes, elimizdegi hırýrgııa salasynda, transplantologııa salasynda júrgen 3 myńǵa jýyq hırýrgtyń eńbegine berilgen úlken baǵa dep esepteımin. Sondyqtan bul bizge úlken mindet pen senim artylǵanyn kórsetedi. Endi hırýrgııa kómegin sapasyn arttyra túsýge jumys jasaýymyz kerek, – dedi B. Baımahanov Aqorda kýlýarynda.
Dárigerdiń aıtýynsha, elimizde transplantologııa salasy óte qarqyndy damyp keledi. Óıtkeni oǵan suranys óte joǵary, ásirese búırek, baýyr, júrek jáne ókpe transplantatsııasy jıi jasalady.
Qazirgi tańda hırýrgııa salasyna jańa tehnologııalar belsendi engizilýde. Mınıınvazıvti jáne laparoskopııalyq operatsııalarmen qatar robottandyrylǵan hırýrgııa men jasandy ıntellekt múmkindikteri keńinen qoldanylyp jatyr.
– Biz medıtsınadaǵy eń kúrdeli baǵyttardyń biri – aǵza transplantatsııasymen aınalysamyz. Ásirese, tiri týystyq donordan aǵza almastyrý otalary joǵary deńgeıde júrgizilip keledi. Sońǵy 10 jyldan astam ýaqytta elimizde 3,5 myńǵa jýyq transplantatsııa jasaldy. Olardyń qatarynda balalar da bar. Sondyqtan Qazaqstan transplantologııany damytý jáne ozyq medıtsınalyq tehnologııalardy engizý boıynsha Ortalyq Azııa boıynsha aldyńǵy qatarda desek, artyq aıtpaımyz, – dedi B. Baımahanov.
Búginde Qazaqstandaǵy kóptegen medıtsınalyq ortalyqtar álemniń jetekshi klınıkalary deńgeıinde jumys isteıdi jáne jýyrda ǵana biregeı sanalǵan kúrdeli operatsııalardy sátti oryndap keledi.
– Álemniń ozyq klınıkalarynda jasalyp, bizdiń elde qoldanylmaıtyn tehnologııa nemese ota túri joq deýge bolady. Bul – bizdiń basty ustanymymyz. Óıtkeni biz Ulttyq hırýrgııa ortalyǵy mártebesine ıemiz. Bizge elimizdiń túkpir-túkpirinen naýqastar keledi. Sondyqtan joǵary kásibı deńgeıdi saqtap, sapa standarttaryna saı jumys isteý – bizdiń mindetimiz, – deıdá dáriger.
Aıta keteıik, búgin Aqordada Prezıdent medıtsına qyzmetkerlerin kásibı merekesimen quttyqtady. Elimizde maýsymnyń ər úshinshi jeksenbisi – medıtsına qyzmetkerleriniń kúni. Bul kúndi atap ótý QR Prezıdentiniń 1998 jylǵy Jarlyǵymen belgilengen.
Jańa Konstıtýtsııada «ult saýlyǵy» uǵymyna alǵash ret nazar aýdaryldy.
Prezıdent medıtsına qyzmetkerlerine kúsh kórsetken adamdardy qylmystyq jaýapkershilikke tartý týraly da pikir bildirdi.
Sondaı-aq, Memleket basshysy qoǵamdyq oryndarda ádep saqtaý máselesin kóterdi.
Bıyldyń ózinde medıtsına mamandarynyń jalaqysyn ósirýge 33 mıllıard teńge bólingen.
Al Astana medıtsına ýnıversıtetine Tóregeldi Sharmanovtyń esimi beriledi.
