Qazaqstanda álemdik deńgeıdegi AI kampýsy ashylady
ASTANA. KAZINFORM - Qazaqstan Respýblıkasy Jasandy ıntellekt jáne tsıfrlyq damý mınıstrligi men jahandyq Network School bastamasy jasandy ıntellekt, ınnovatsııalar, tehnologııalyq kásipkerlik jáne adamı kapıtaldy damytý salasyndaǵy strategııalyq yntymaqtastyq týraly Ózara túsinistik memorandýmyna qol qoıdy.
QR Jasandy ıntellekt jáne tsıfrlyq damý mınıstrligi baspasóz qyzmetiniń habarlaýynsha, Network School búkil álemnen kásipkerlerdi, ınjenerlerdi, zertteýshiler men ınvestorlardy biriktiredi, al onyń negizin qalaýshy Baladjı Shrınıvasan - Kremnıı alqabynyń eń tanymal tehnologııalyq kásipkerleriniń biri, Coinbase kompanııasynyń burynǵy CTO-sy jáne júzdegen tehnologııalyq kompanııalardyń ınvestory.
Qujatqa QR Premer-mınıstriniń orynbasary - Jasandy ıntellekt jáne tsıfrlyq damý mınıstri Jaslan Mádıev pen Network School negizin qalaýshy jáne CEO Baladjı Shrınıvasan qol qoıdy.
Jaslan Mádıev kelisimge qol qoıa otyryp: «Jasandy ıntellekt myqty adamdar, batyl ıdeıalar jáne olar júzege asa alatyn orta bar jerde damıdy. Biz Qazaqstanda dál sondaı - talanttarǵa, tehnologııalyq kásipkerlerge jáne jahandyq seriktestikterge ashyq ekojúıeni quryp jatyrmyz. Network School uıymymen yntymaqtastyq bul jumysty odan ári kúsheıtýge kómektesedi», - dep atap ótti.
Memorandým yntymaqtastyqtyń negizgi baǵyttaryn, sonyń ishinde jasandy ıntellekt salasyndaǵy bilim berý baǵdarlamalaryn damytýdy, startaptardy qoldaýdy, birlesken zertteýler júrgizýdi, halyqaralyq ǵylymı jáne tehnologııalyq yntymaqtastyqty damytýdy, sondaı-aq Qazaqstanǵa álemdik jetekshi mamandardy, kásipkerlerdi, zertteýshiler men ınvestorlardy tartýdy aıqyndaıdy.
Basty baǵyttardyń biri Qazaqstanda Network School-dyń alǵashqy kampýsyn qurý bolmaq. Onyń bazasynda álemdik deńgeıdegi bilim berý, zertteý jáne kásipkerlik baǵdarlamalaryn, halyqaralyq rezıdenttik jáne fellowship baǵdarlamalaryn júzege asyrý, sondaı-aq kampýsty Qazaqstannyń ulttyq JI-ekojúıesine biriktirý josparlanýda.
Sondaı-aq, taraptar startaptarǵa arnalǵan baǵdarlamalardy birlesip damytýdy, halyqaralyq konferentsııalar, hakatondar men forýmdar uıymdastyrýdy, sondaı-aq Qazaqstanda Network State Conference 2026 konferentsııasyn ótkizý múmkindigin pysyqtaýdy kózdep otyr.
Qazaqstandy jasandy ıntellekt pen ınnovatsııalardyń óńirlik ortalyǵy retinde ilgeriletýge, halyqaralyq tehnologııalyq kompanııalardy, venchýrlyq qoǵorlar men strategııalyq ınvestorlardy tartýǵa, sondaı-aq tehnologııalyq kásipkerlik úshin qolaıly ortany damytýǵa erekshe nazar aýdarylatyn bolady.
Yntymaqtastyq aıasynda taraptar halyqaralyq mamandar men tehnologııalyq kompanııalardy tartý tetikterin jetildirý, tsıfrlyq memlekettik basqarýdy damytý, jasandy ıntellekt salasyndaǵy úzdik álemdik tájirıbelermen almasý jáne birlesken strategııalyq bastamalardy iske asyrý múmkindikterin de qarastyrmaq.
Memorandýmdy iske asyrý 5 jylǵa eseptelgen jáne bul ýaǵdalastyqtardyń oryndalýy Qazaqstannyń jasandy ıntellekt, ınnovatsııalar men tehnologııalyq kásipkerlikti damytýdaǵy jetekshi óńirlik ortalyqtardyń biri retindegi halyqaralyq pozıtsııalaryn nyǵaıtýǵa yqpal etedi dep kútilýde.
Osyǵan deıin jasandy ıntellekt áleminde Qazaqstannyń orny týraly jazdyq.
