Qazaqstanda álemdik qarjy daǵdarysy aıasynda jyljymaıtyn múlik naryǵy onlaın júıesinde damıtyn bolady - R. Mashýrov
ALMATY. QazAqparat - Qazaqstanda álemdik qarjy daǵdarysy aıasynda jyljymaıtyn múlik naryǵy aldaǵy ýaqytta onlaın júıesinde qaryshtap damıtyn bolady. Bul týraly búgin Almatyda jyljymaıtyn múlik naryǵyndaǵy ahýalǵa baılanysty ótken baspasóz máslıhaty barysynda halyqaralyq Homsters kompanııasynyń qazaqstandyq ókildiginiń jetekshisi Rasýl Mashýrov málim etti.
Onyń aıtýynsha, Qazaqstanda ǵalamtor jelisiniń qamtylý deńgeıi mańyzdy mejeden asty.
«Álemdik tájirıbege qaraıtyn bolsaq, halqynyń ınternetpen qamtylý deńgeıi 50 paıyzdan asqan elde jyljymaıtyn múlik naryǵy avtomatty túrde offlaın júıesinen onlaın júıesine belsendi túrde aýysa bastaıdy. Al qazirgi álemdik qarjy daǵdarysy kezinde bul úderis jyldam júretin bolady. Óıtkeni, jyljymaıtyn múlikti jarnamalaý, satý, satyp alý, jalǵa berý jaǵdaıy onlaın júıesinde edáýir arzan ári jyldam júzege asady. Kúni búginge deıin jyljymaıtyn múlik naryǵynda qyzmet atqaratyn qazaqstandyq kompanııalar ózderiniń marketıngtik bıýdjetiniń 4 paıyzyn ǵana ǵalamtor jelisine baǵyttap kelse, endi bul kórsetkish jaqyn bolashaqta 20 paıyzǵa jetedi. Buǵan elimizde ǵalamtor jelisiniń damýy da oń áserin tıgizip otyr. Nege deseńizder, Qazaqstanda bıyl halyqty ǵalamtor jelisimen qamtý deńgeıi 55 paıyzǵa jetti. ıAǵnı, turǵyndardyń 55 paıyzy ınternetti belsendi túrde paıdalanady degen sóz. Bul óte úlken jetistik! Demek, bir jaǵy daǵdarysqa baılanysty, ekinshi jarnama salasynyń barǵan saıyn arzan onlaın júıesine aýysýyna sáıkes, jyljymaıtyn múlik naryǵyndaǵy satý, satyp alý úderisteri arta túsedi», - dedi óz sózinde R. Mashýrov.
