Qazaqstanda álemdik deńgeıdegi 4 kolledj qurylady
ASTANA. 9 qańtar. QazAqparat - 2011 jyly elimizde Bilim berýdi damytýdyń memlekettik baǵdarlamasy qolǵa alyndy. Qazirgi tańda osy baǵdarlama aıasynda kásiptik jáne tehnıkalyq bilim berý júıesi jetildirilip jatyr,
bul - eldi ındýstrııalandyrý qajettiliginen týyndaǵan is-shara, dep habarlady Bilim jáne ǵylym mınıstrliginen Pm.kz saıtyna.
Buǵan deıin habarlaǵandaı, elimizde kásiptik-tehnıkalyq bilim júıesin damytý úshin 2011 jyldyń maýsym aıynda «Kásipqor» holdıngi quryldy jáne osy qordyń bazasynda Astana, Almaty, Aqtóbe, Shymkent qalalarynda álemdik deńgeıdegi kolledjder qurý josparlanýda. Mınıstrliktiń aqparaty boıynsha, kolledjderde ınjınırıng, sáýlet jáne qurylys, aqparattyq jáne kommýnıkatsııalyq tehnologııa, dızaın jáne jobalaý, AÓK, metallýrgııa jáne mashına jasaý, sondaı-aq pánaralyq mektepter jumys isteıtin bolady.
Holdıng jalpy alǵanda, ÚIID baǵdarlamasynyń qajetin eskere otyryp jáne eńbek naryǵynda suranysqa ıe 90 mamandyq boıynsha 15 myń adamdy oqýmen (respýblıkanyń 16 óńiri boıynsha) qamtýdy josparlap otyr.
Oǵan qosa, kásiptik-tehnıkalyq bilim berýdiń qoljetimdi bolýyn qamtamasyz etý maqsatymen qazir Qazaqstanda kadrlar daıarlaý men qaıta daıarlaıtyn tórt óńiraralyq ortalyqtyń qurylysy júrip jatyr. Atap aıtsaq, Atyraý qalasynda munaı-gaz salasy úshin kadrlardy daıarlaý men qaıta daıarlaý jónindegi óńiraralyq ortalyqtyń qurylysy aıaqtalýǵa jaqyn. Ekibastuzdaǵy otyn-energetıkalyq salasynda tehnıkalyq jáne qyzmet kórsetý eńbegi úshin jáne Óskemen qalasynda mashına jasaý salasy úshin kadrlardy daıarlaý men qaıta daıarlaý jónindegi óńiraralyq ortalyqtardyń qurylysy jalǵasýda. Aǵymdaǵy jyldyń qarasha aıynda Shymkent qalasynda óńdeýshi ónerkásip salasy úshin óńiraralyq ortalyqtyń qurylysy bastaldy.
