Qazaqstanda álemdik 350.org ekologııalyq qozǵalysynyń ókildigi ashyldy
ALMATY. Shildeniń 7-si. QazAqparat /Erbol Azanbek/ - Qazaqstanda álimdik 350.org ekologııalyq qozǵalysynyń ókildigi resmı túrde ashyldy. Bul týraly búgin Almatyda arnaıy ótken baspasóz máslıhatynda qozǵalys ókilderi aıtty,
dep habarlaıdy QazAqparat.
Qozǵalystyń Qazaqstandaǵy ulttyq úılestirýshisi Pavel Koktyshevtiń aıtýynsha, qozǵalys elimizde 2 jyldan beri jumys istep keledi. Biraq resmı túrde búgin ǵana ashylyp otyr. «Biz álemdik qozǵalys ıdeıalaryn Qazaqstanda júzege asyrýdy kózdeımiz. Álemdik qozǵalystyń basty maqsaty - aýadaǵy lastaný mólsherin 350 mıllıon birlikke jetkizý. Qazirgi deńgeı 390 mıllıon birlik. Osynyń saldarynan Pákistan sý astynda qalyp, Reseı otqa oranyp jatyr, jer betindegi muzdyqtar erýde. Bul másele bizdi de aınalyp ótip otyrǵan joq. Sondyqtan bir top jastar qozǵalys qurýdy jón kórdik», deıdi P.Koktyshev. Onyń aıtýynsha, qozǵalys aldaǵy ýaqytta elimizdiń barlyq oblystarynan ókildik ashyp, ekologııany qoldaý baǵytynda túrli sharalar ótkizbek. «Bul baǵytta www.350.kz saıtyn iske qostyq. Óıtkeni kóp jaǵdaıda jumysymyz ınternet keńistigi arqyly júzege asyrylady», deıdi qozǵalys ókili.
