Qazaqstanda alem.ai battle jasandy ıntellekt baıqaýyna ótinim qabyldaý bastaldy
ASTANA. KAZINFORM – Tsıfrlandyrý jáne jasandy ıntellekt jyly aıasynda elimizde ulttyq alem.ai battle baıqaýyna ótinim qabyldaý bastaldy. Bul – Qazaqstannyń túkpir-túkpirindegi AI-talanttardy qoldaýǵa jáne damytýǵa baǵyttalǵan aýqymdy bastama. Baıqaýdyń fınaldyq kezeńi Astanada ornalasqan alem.ai halyqaralyq jasandy ıntellekt ortalyǵynda ótedi.
Ótinimder 2026 jylǵy 22 aqpanǵa deıin myna silteme boıynsha qabyldanady.
Alem.ai battle oqýshylardy, stýdentterdi, startap-komandalardy jáne zertteýshilerdi bir alańǵa toǵystyryp, AI-jobalardyń prototıpten bastap tolyqqandy tehnologııalyq sheshimge deıin júıeli túrde damýyna múmkindik beredi.
Baıqaý tórt negizgi sanat boıynsha ótedi:
AI Young Talents – jumys isteıtin MVP deńgeıindegi AI-jobalary bar 12-18 jas aralyǵyndaǵy mektep oqýshylary;
AI Driving Power – jumys isteıtin MVP deńgeıindegi AI-jobalary bar kolledjder men joǵary oqý oryndarynyń stýdentteri;
AI Future Builders – AI-ónimi men prototıpi nemese MVP-si bar, naryqta dáleldengen trekshni (aqyly pılottar, satylymdar) bar komandalar;
AI Innovators – jasandy ıntellekt quramdas bóligi bar ǵylymı-zertteý jáne tájirıbelik-konstrýktorlyq jumystarǵa negizdelgen jobalar.
Baıqaýdyń jalpy júlde qory 25 mln teńgeni quraıdy. Іrikteý nátıjesinde fınalǵa 20 úzdik komanda joldama alady. Qorytyndy kezeńde sarapshylar alqasy ár sanat boıynsha tórt jeńimpazdy anyqtaıdy.
Alem.ai battle – elimizdegi AI-talanttar men áleýeti joǵary jobalardy damytýǵa baǵyttalǵan júıeli jumystyń jalǵasy. 2025 jyly Digital Bridge halyqaralyq forýmy aıasynda ótken AI SANA: Generative Nation ulttyq baıqaýy qazaqstandyq qatysýshylardyń joǵary deńgeıin jáne otandyq AI-jobalardyń jetilgenin kórsetti.
– Memleket basshysy Qasym-Jomart Toqaevtyń tapsyrmalary aıasynda biz tsıfrlyq mamandardy júıeli túrde daıarlap, damytyp kelemiz. Byltyr AI SANA: Generative Nation Qazaqstanda AI salasynda jetkilikti ári myqty daryndy jastar ortasy qalyptasqanyn dáleldedi. Bul jaı ǵana áleýet emes, naqty áreket etetin kúsh. Biz mekteptegi ıdeıalardyń jumys isteıtin prototıpterge, stýdenttik bastamalardyń salalardyń tsıfrlyq transformatsııasyna, al ǵylymı zertteýlerdiń joǵary tehnologııalyq jobalarǵa aınalyp jatqanyn kórip otyrmyz. alem.ai battle osy joldyń zańdy jalǵasy ári jasandy ıntellekt salasyndaǵy bolashaq kóshbasshylardy qalyptastyrýǵa baǵyttalǵan mıssııamyzdyń bir bóligi, - dedi Qazaqstan Respýblıkasy Premer-Mınıstriniń orynbasary – Jasandy ıntellekt jáne tsıfrlyq damý mınıstri Jaslan Mádıev.
Tsıfrlandyrý jáne jasandy ıntellekt jyly aıasynda ótkiziletin baıqaýdy Astana Hub QR JITsDM qoldaýymen júzege asyrady. Bul bastama – alem.ai platformasynyń adam kapıtalyn damytýǵa arnalǵan uzaqmerzimdi strategııasynyń bir bóligi.
Halyqaralyq jasandy ıntellekt ortalyǵynyń bazasynda jyl saıyn 10 000-ǵa jýyq talantty tartý, 5 000 mektep oqýshysyn oqytý, keminde 1 000 AI mamanyn daıarlaý, 100-ge jýyq AI-startapty iske qosý jáne jasandy ıntellekt salasynda 10-ǵa jýyq ǵylymı zertteý júrgizý josparlanyp otyr.
Baıqaý týraly tolyq aqparat alyp, ótinim berý úshin myna siltemeni basyńyz.
Eske sala keteıik, buǵan deıin balalardyń qaýipsizdigin baqylaý úshin jasandy ıntellekt tehnologııalary engiziletinin habarlaǵan edik.
