Qazaqstanda aldymen qaı poıyzdarǵa ınternet qosylady
ASTANA. KAZINFORM – «Qazaqstan temir joly» ulttyq kompanııasy jolaýshylar poıyzdaryn ınternetpen kezeń-kezeńimen qamtyp jatyr. Bul týraly Úkimettegi brıfıngte «QTJ» AQ basqarma tóraǵasynyń strategııa jáne tsıfrlandyrý jónindegi orynbasary Ánýar Ahmetjanov málimdedi.
Onyń aıtýynsha, qazirgi ýaqytta jolaýshylardyń ınternetke degen suranysy joǵary. Kompanııa bul qajettilikti eskerip, tıisti jobalardy iske asyrýǵa kirisken.
Ótken jyly tómen orbıtaly spýtnıktik júıeler – OneWeb pen Starlink tehnologııalaryn paıdalanyp, eki pılottyq joba júrgizilgen. Olar Astana – Mańǵystaý jáne Astana – Shymkent baǵyttaryndaǵy poıyzdarda synaqtan ótken.
— Búginde biz Úkimettiń, «QTJ» basshylyǵynyń jáne Memleket basshysynyń tapsyrmasyna sáıkes jolaýshylar poıyzdaryn ınternetpen qamtýdyń aýqymdy jumysyn bastap kettik. Ázirge áńgime tek ulttyq tasymaldaýshynyń jolaýshylar poıyzdary týraly bolyp otyr. Qazirdiń ózinde «Nurly jol» – Semeı baǵyty tolyq ınternetpen qamtamasyz etildi. Sonymen qatar Almaty – Pavlodar (31/32-poıyzdar), Pavlodar – Túrkistan (45/46-poıyzdar), «Nurly jol» – Atyraý (47/48-poıyzdar) baǵyttarynda jáne basqa da birqatar poıyzdarda termınaldar ornatylyp jatyr, — dedi ol.
Kompanııa málimetinshe, aldymen ınternet jolaýshylar aǵyny kóp baǵyttarǵa qosylýda. Jospar boıynsha, jazdyń sońyna deıin negizgi baǵyttar tolyqtaı spýtnıktik ınternetpen qamtylmaq.
Aıta keteıik, buǵan deıin elimizde vokzaldardy jańǵyrtýǵa 100 mlrd teńge jumsalatyny habarlanǵan edi.
